UDutheronomi 17 - iBhayibhili Elingcwele 1978

¹ Lingahlabeli iNkosi uNkulunkulu wenu inkabi lemvu elesici loba elenye into embi, ngoba lokhu kuyisinengiso eNkosini uNkulunkulu wenu.

² Uba kukhona phakathi kwenu, emizini yenu iNkosi uNkulunkulu wenu elinika yona, owesilisa loba owesifazana owenza okubi emehlweni eNkosi uNkulunkulu wenu ngokwaphula isivumelwano sayo,

³ osuke ayekhonza abanye onkulunkulu, akhothamele loba ilanga lenyanga, ingabe enye yezinkanyezi esezulwini, enze lokho iNkosi elinqabele khona,

⁴ beselibikelwa khona, likuzwe, lizakukubuzisisa. Uba kuliqiniso, uba kuqinisekile sibili ukuthi into enjalo eyisinengiso yenziwe koIsrayeli,

⁵ lizakuthatha lowomuntu owenze okubi lokho, limuse emasangweni enu, limkhande ngamatshe aze afe.

⁶ Umuntu ofanele ukufa angabulawa kuphela ngamazwi ofakazi ababili loba abathathu; kodwa umuntu kayikubulawa ngamazwi ofakazi oyedwa nje.

⁷ Ofakazi bazamtshaya kuqala ukumbulala, andubana bamtshaye abantu bonke. Ngalokhu lizakuqeda ububi phakathi kwenu.

⁸ Uba kulethwa kini indaba elahlulayo ekwahluleleni kwenu, indaba yokubulala, loba eyelungelo lomuntu, loba eyokutshayana, loba izindaba zokuphikisana emizini yenu, lizakusuka liye endaweni iNkosi uNkulunkulu wenu ezakuyikhetha,

⁹ liye kubapristi abangamaLevi lakumahluleli ozakuba ekhona ngalezonsuku, libabikele ukuze balitshele isiqumo sabo sokwahlulela.

¹⁰ Lizakwenza njengesiqumo sabo abazakulitshela sona endaweni iNkosi ezayikhetha; linanzelele ukwenza konke njengokulilaya kwabo;

¹¹ lenze njengokulitshela kwabo lanjengesiqumo abalitshela sona; lingaphambukeli ngakwesokunene langakwesokhohlo kwesiqumo abalitshela sona.

¹² Umuntu oziqhenyayo ongalaleli umpristi ophetheyo inkonzo phambi kweNkosi uNkulunkulu wenu, longalaleli umahluleli, uzakubulawa. Ngalokhu lizakuqeda ububi koIsrayeli.

¹³ Bonke abantu bazakuzwa, besabe, bangaphindi ukuziqhenya.

Imilayezo ngenkosi

¹⁴ Lapho selifikile elizweni iNkosi uNkulunkulu wenu elinika lona ukuba libe ngelenu, lihlale kilo, beselisithi: Asizibekele inkosi njengazo zonke izizwe ezisizingelezeleyo;

¹⁵ kumele ukuba libeke umuntu ozakukhethwa yiNkosi uNkulunkulu wenu ukuba yinkosi yenu; umuntu wakini limbeke abe yinkosi yenu; lingabeki owezizweni ongesuye wakini.

¹⁶ Qaphelani ukuba angabi lamabhiza amanengi lokuba angababuyiseli abantu eGibithe ukuze andise amabhiza akhe, lokhu iNkosi ithe kini: Kalisoze libuyele futhi ngaleyondlela.

¹⁷ Futhi angathathi abafazi abanengi, funa inhliziyo yakhe iduhe; njalo angazinothisi ngesiliva langegolide.

¹⁸ Kuzakuthi nxa ebekwa esihlalweni sakhe sobukhosi azilobele lumlayo encwadini, alobe lawomazwi asencwadini ephethwe ngabapristi abangamaLevi.

¹⁹ Uzakuhlala elayo, ayibale insuku zonke zokuphila kwakhe, ukuba afunde ukuyesaba iNkosi uNkulunkulu wakhe, agcine wonke amazwi alumlayo lezimiso lezi, azenze,

²⁰ ukuze inhliziyo yakhe ingazikhukhumezi phezu kwabakibo, angaphambuki emithethweni aye ngakwesokunene loba ngakwesokhohlo, aphile isikhathi eside embusweni wakhe wakoIsrayeli, yena labantwana bakhe.