UDutheronomi 16 - iBhayibhili Elingcwele 1978

Imikhosi emithathu emikhulu

¹ Gcinani inyanga kaAbibi, liyidumise iNkosi, uNkulunkulu wenu, ngokugcina iPhasika, ngoba ngenyanga kaAbibi iNkosi uNkulunkulu wenu yalikhupha eGibithe ebusuku.

² Lizakuthatha ezimvini zenu loba ezinkomeni zenu, linikele umhlatshelo wePhasika eNkosini uNkulunkulu wenu endaweni iNkosi ezakuyikhetha ukuba idunyiselwe kiyo.

³ Lingadli isinkwa esilemvubelo kanye lomhlatshelo wePhasika; insuku eziyisikhombisa lizawudla kanye lesinkwa esingelamvubelo, isinkwa senhlupheko — ngoba laphuma eGibithe ngokuphangisa. — Ngalokhu lizakulukhumbula usuku lokuphuma kwenu eGibithe zonke insuku zokuhamba kwenu.

⁴ Kakungabonwa mvubelo kulo lonke ilizwe lenu insuku eziyisikhombisa; futhi inyama eliyihlaba ngosuku lokuqala kusihlwa kayingalali ubusuku bonke kuze kuse.

⁵ Lingawunikeli umhlatshelo wePhasika emizini yenu elinika yona iNkosi uNkulunkulu wenu,

⁶ kodwa kuphela endaweni iNkosi uNkulunkulu wenu ezakuyikhetha ukuba idunyiselwe kiyo. Nikelani khona umhlatshelo wePhasika ekutshoneni kwelanga, ngesikhathi elaphuma ngaso eGibithe.

⁷ Lizakuwupheka, lilidlele iPhasika endaweni iNkosi uNkulunkulu wenu ezakuyikhetha; ekuseni lizabuyela emathenteni enu.

⁸ Insuku eziyisithupha lizakudla isinkwa esingelamvubelo; ngosuku lwesikhombisa kube lenkonzo yokucina eNkosini uNkulunkulu wenu; lingasebenzi ngalo.

⁹ Kalibobala amaviki aba yisikhombisa, liwabale kusukela esikhathini eliqala ngaso ukuvuna amabele.

¹⁰ Ng’khona lizakuyigcinela iNkosi uNkulunkulu wenu umkhosi wamaviki ngokupha umnikelo wesihle ngezandla zenu, liwunike njengokubusiswa kwenu yiNkosi uNkulunkulu wenu.

¹¹ Endaweni iNkosi ezakuyikhetha ukuba lidunyiselwe kiyo lizakuthokoza phambi kwayo lina lamadodana enu lamadodakazi enu, lenceku zenu lencekukazi zenu, lomLevi ohlala emizini yenu, lowezizweni, lentandane, lomfelwakazi, abahlala kini.

¹² Khumbulani ukuthi laliyizigqili eGibithe, ligcine kuhle lezizimiso.

¹³ Gcinani umkhosi wamadumba insuku eziyisikhombisa, lapho seliqedile ukubhula lokukhama iwayini,

¹⁴ lithabe emkhosini lina lamadodana enu lamadodakazi enu, lenceku zenu lencekukazi zenu, lomLevi, lowezizweni, lentandane, lomfelwakazi, abahlala emizini yenu.

¹⁵ Insuku eziyisikhombisa lizayigcinela iNkosi uNkulunkulu wenu umkhosi endaweni ezayikhetha; ngoba izakulibusisa kuzo zonke izithelo zenu lakuwo wonke umsebenzi wezandla zenu, ukuba lithokoze kakhulu.

¹⁶ Kathathu ngomnyaka bonke abesilisa benu bazakuza ukuyikhonza iNkosi uNkulunkulu wenu endaweni ezakuyikhetha, ngomkhosi wesinkwa esingelamvubelo, ngomkhosi wamaviki, langomkhosi wamadumba. Kabangezi ukuyidumisa iNkosi bengaphathanga lutho;

¹⁷ kodwa yilowo lalowo anike ngamandla akhe, lanjengesibusiso iNkosi uNkulunkulu wenu elinike sona.

Abahluleli lomsebenzi wabo

¹⁸ Lizakukhetha abahluleli lezinduna emizini yonke yezizwe zenu, iNkosi uNkulunkulu wenu elinika yona, ukuba bahlulele abantu ngokwahlulela okulungileyo.

¹⁹ Lingonakalisi ukulunga, lingabandlululi muntu, lingamukeli umvuzo wokuthengwa, ngoba uphumputhekisa amehlo abahlakaniphileyo, wonakalise indaba yabalungileyo.

²⁰ Nxwanelani ukulunga kuphela, ukuba lisile, lithumbe ilizwe elinika lona iNkosi uNkulunkulu wenu.

²¹ Lingagxumeki isigodo sibe yinsika kankulunkulukazi uAshera ngaseceleni kwealtare leNkosi uNkulunkulu wenu elizakulenza;

²² lingamisi nsika yokukhonzela, ngoba iNkosi uNkulunkulu wenu iyayizonda.