UDutheronomi 15 - iBhayibhili Elingcwele 1978

Umnyaka wokuyekela imilandu

¹ Ngasekupheleni kweminyaka yonke eyisikhombisa lizakuyekela imilandu.

² Lizakuyiyekela ngalindlela; lowo lalowomuntu oweboleke omunye uzakumyekela umakhelwana wakhe isikwelede sakhe, angasibizi kowakibo, ngoba ukuyekela kumenyezelwe yiNkosi.

³ Lingasibiza kowezizweni; kodwa uba umfowenu elokwakho loba kuyini elizakukuyekela.

⁴ Kodwa kakuyikuba labayanga phakathi kwenu, ngoba iNkosi uNkulunkulu wenu izakulibusisa elizweni elinika lina ukuba libe ngelenu,

⁵ uba lilalela ilizwi leNkosi uNkulunkulu wenu isibili, ligcine kuhle limithetho yonke engililaya yona lamuhla.

⁶ INkosi uNkulunkulu wenu izalibusisa njengokulithembisa kwayo: lizakweboleka izizwe ezinengi, kodwa kaliyikweboleka lutho kuzo; lizakubusa izizwe ezinengi, kodwa zona kaziyikulibusa lina.

⁷ Uba kukhona phakathi kwenu umuntu ongumyanga ongowakini, okhona komunye wemizi yenu elizweni lakini elinika lina iNkosi uNkulunkulu wenu, lingenzi inhliziyo zenu zibe lukhuni, lincitshane,

⁸ kodwa mpheni yena, limeboleke njengokuswela kwakhe, loba kuyini.

⁹ Lingali ukumeboleka ulutho ngoba umnyaka wesikhombisa, umnyaka wokuyekela ususeduze; qaphelani ukuba kungabi khona umcabango onje enhliziyweni zenu. Uba lisala ukumeboleka uzakhala eNkosini ngani, libe lesono.

¹⁰ Kodwake mnikeni ngesihle, inhliziyo yenu ivuma nxa limnika; ngoba ngenxa yalokhu iNkosi uNkulunkulu wenu izakulibusisa kuwo wonke umsebenzi wenu lakukho konke ukwenza kwenu.

¹¹ Abayanga kabasoze baphele elizweni. Ngakho ngiyalilaya ngithi: Phanani abantu bakini, abaswelayo labangabayanga abaselizweni lakini.

Ukuphathwa kwezigqili

¹² Uba owakini, umHeberu loba umHeberukazi, ethengiswa kuwe, uzakukusebenzela iminyaka eyisithupha; ngomnyaka wesikhombisa uzakumkhulula ukuba ahambe.

¹³ Lapho umkhulula ukuba ahambe, ungamvumeli ukuhamba engaphathanga lutho;

¹⁴ muphe ngesihle ezimvini zakho, lokwesibuya sakho, lokwesikhamelo sakho sewayini; umuphe njengalokhu iNkosi uNkulunkulu wakho ekubusisile.

¹⁵ Uzakhumbula ukuthi lawe wawuyisigqili elizweni laseGibithe, lokuthi iNkosi uNkulunkulu wakho yakuhlenga. Ngalokho ngiyakulaya lamuhla.

¹⁶ Kodwa uba yena esithi kuwe: Kangiyikusuka kuwe; ngoba ekuthanda labendlu yakho, langoba ehlezi kuhle lawe,

¹⁷ uzakuthatha usungulo, ubhobozele indlebe yakhe ngalo emnyango, ukuba abe yisigqili sakho kokuphela; wenze njalo lakuso isigqilikazi sakho.

¹⁸ Kakungabi lukhuni kuwe ukumkhulula ukuba ahambe; ngoba ukusebenzele iminyaka eyisithupha ngengxenye yemali yoqatshiweyo. Ngakho iNkosi uNkulunkulu wakho izakukubusisa kukho konke okwenzayo.

Amazibulo ezinkomo

¹⁹ Lizakuwehlukanisela iNkosi uNkulunkulu wenu wonke amazibulo amaduna ezinkomo zenu lawezimvu zenu; kaliyikusebenza ngezibulo lezinkomo zenu, futhi kaliyikugunda izibulo lezimvu zenu.

²⁰ Lizakulidla lina labezindlu zenu phambi kweNkosi uNkulunkulu wenu iminyaka ngeminyaka endaweni iNkosi ezakuyikhetha.

²¹ Kodwa uba izibulo lilesici, loba liqhula, loba liyisiphofu, loba lilasiphi isici, lingalihlabeli iNkosi uNkulunkulu wenu.

²² Lingalidla emizini yenu. Abahlambulukileyo labangahlambulukanga bangalidla, njengalokhu kudliwa umziki lempala.

²³ Kodwake lingadli igazi lalo; lilichithele emhlabathini njengamanzi.