UDutheronomi 14 - iBhayibhili Elingcwele 1978

Ngezinto ezithile ezingafanele ukwenziwa emngcwabeni

¹ Lina lingabantwana beNkosi uNkulunkulu wenu. Kaliyikuzisika, lingaziphuculi emabunzini enu ngenxa yabafileyo.

² Ngoba lingabantu abangcwele eNkosini yenu; ilikhethile ukuba libe ligugu layo phakathi kwezizwe zonke zasemhlabeni.

Inyamazana ezihlambulukileyo lezingahlambulukanga

³ Lingabokudla ulutho olunengekayo.

⁴ Yilezi inyamazana elingazidla, inkabi lemvu lembuzi,

⁵ impala lomziki lenkolomi, lembuzi yeganga, lomtshwayeli lebhalabhala legogo.

⁶ Lingadla zonke inyamazana ezidabule amangqina ezetshisayo.

⁷ Kodwa kuzo ezetshisayo lakuzo ezidabule amangqina, lingadli ikamela lomvundla lembila, ngoba zona ziyetshisa kodwa kazidabulanga amangqina; zingcolile kini;

⁸ lengulube ingcolile kini, ngoba idabule amangqina kodwa kayetshisi. Lingabokudla inyama yazo, lingathinti izidumbu zazo.

⁹ Kuzo zonke ezihlala emanzini lingadla zonke ezilamaphiko lamaxolo.

¹⁰ Kodwa lezo ezingelamaphiko lamaxolo lingazidli, ngoba zingcolile kini.

¹¹ Lingadla zonke inyoni ezihlambulukileyo.

¹² Kodwa yilezi elingayikuzidla, ukhozi lelinqe lengqungqulu,

¹³ lomzwazwa, lezinhlobo zonke zabomahelwane,

¹⁴ zonke inhlobo zamawabayi,

¹⁵ intshe, lomandukulo, lenkanku, lezinhlobo zonke zenkozi,

¹⁶ isikhova esincinyane lesikhova esikhulu, lesikhova esibamba inhlanzi,

¹⁷ levuba, lelinqe elikhulu, lenyonga,

¹⁸ lezinhlobo zamangabuzane, lehemu, imvenduna lolulwane.

¹⁹ Zonke izibungu ezilamaphiko zingcolile kini; kazingadliwa.

²⁰ Lingadla konke okuhlambulukileyo okulamaphiko.

²¹ Lingabokudla ulutho oluzifeleyo; lingabanika lona abezizweni abahlala emizini yenu ukuba baludle, loba liluthengise kwabezizwe; ngoba lingabantu abangcwele eNkosini uNkulunkulu wenu. Futhi lingapheki izinyane lembuzi ngochago lukanina.

Umthetho omayelana lokwetshumi

²² Iminyaka ngeminyaka lizakukhupha okwetshumi kuzo zonke izithelo zenhlanyelo yenu ezivela emasimini.

²³ Phambi kweNkosi uNkulunkulu wenu, endaweni ezakuyikhetha ukuba idunyiselwe kiyo, lizakudla okwetshumi kwamabele enu lokwewayini lenu lokwamagcobo enu, lamazibulo enkomo zenu lawezimvu zenu, ukuba lifunde ukuyesaba iNkosi uNkulunkulu wenu njalonjalo.

²⁴ Uba indlela inde kakhulu kini, lahluleke ukuletha okwetshumi kwenu ngoba ikhatshana lani indawo iNkosi uNkulunkulu wenu ezakuyikhetha ukuba idunyiselwe kiyo, lapho elibusisile,

²⁵ lizakukhupha okwetshumi kwenu ngemali, liyiphathe, liye endaweni iNkosi uNkulunkulu wenu ezakuyikhetha,

²⁶ lithenge ngaleyomali lokho elikufisayo, izinkabi loba izimvu loba iwayini loba utshwala, loba kuyini inhliziyo yenu ekufisayo; lidle khona phambi kweNkosi uNkulunkulu wenu, lithabe lina labendlu zenu.

²⁷ UmLevi ophakathi kwemizi yenu lingamkhohlwa, ngoba engelasabelo lelifa kini.

²⁸ Ngasekupheleni kweminyaka yonke emithathu lizakukhupha okwetshumi kwezithelo zenu zonke ngawona lowomnyaka, likubuthelele phakathi kwemizi yenu.

²⁹ UmLevi, lokhu engelasabelo kini, kanye lowemzini, lentandane, lomfelwakazi abaphakathi kwemizi yenu bazakuza, badle, basuthe, ukuba iNkosi uNkulunkulu wenu ilibusise kuwo wonke umsebenzi wezandla zenu.