UDutheronomi 13 - iBhayibhili Elingcwele 1978

¹ Uba kuvela phakathi kwenu umprofethi ingabe umphuphi wamaphupho, alitshengise isibonakaliso loba isimangaliso,

² besekusenzeka isibonakaliso loba isimangaliso alitshengise sona, athi: Asilandele abanye onkulunkulu elingabaziyo, sibakhonze;

³ lingalaleli amazwi alowomprofethi loba lowomphuphi wamaphupho; ngoba iNkosi uNkulunkulu wenu iyalilinga ukuba yazi ukuthi liyayithanda yini iNkosi uNkulunkulu wenu ngenhliziyo yenu yonke langomphefumulo wenu wonke.

⁴ Kodwa lizakulandela iNkosi uNkulunkulu wenu, liyesabe, ligcine imithetho yayo, lilalele ilizwi layo, liyikhonze, libambelele kuyo.

⁵ Lowomprofethi loba lowomphuphi wamaphupho kabulawe, ngoba ulifundisile ukuba liyivukele iNkosi uNkulunkulu wenu, lokuba liphambuke endleleni elalaywa ukuhamba ngayo yiNkosi uNkulunkulu wenu, eyalikhupha eGibithe, yalikhulula endaweni yobugqili ngalokhu. Ngakho khuphani ububi obuphakathi kwenu.

⁶ Uba umfowenu, indodana kanyoko, loba indodana yakho, loba indodakazi yakho, loba umkakho omthandayo, ingabe umngane wakho othandeka kakhulu kuwe, ekuyenga ensitha esithi: Asihambe, siyekhonza abanye onkulunkulu; ongabaziyo wena labokhokho bakho,

⁷ onkulunkulu babantu abalizingelezeleyo, abaseduze lani labakhatshana lani, kusukela komunye umkhawulo womhlaba kuze kufike komunye,

⁸ ungamvumeli, ungamlaleli; futhi ungamhawukeli, ungamyekeli, ungamfihli,

⁹ kodwa umbulale; isandla sakho simtshaye kuqala ukumbulala, andubana zimtshaye izandla zabantu bonke.

¹⁰ Mkhande ngamatshe aze afe, ngoba ubezama ukukuduhisa eNkosini uNkulunkulu wakho, eyakukhupha eGibithe, endaweni yobugqili.

¹¹ Wonke uIsrayeli uzakuzwa ngalokho, esabe, angabe esenza ububi obunjengalobo phakathi kwenu.

¹² Uba lisizwa komunye wemizi yakini, elinika yona iNkosi uNkulunkulu wenu ukuba lihlale kiyo,

¹³ ukuthi abantu abathile ababi bavelile phakathi kwenu, bayenga abalowomuzi besithi: Asihambe siyekhonza abanye onkulunkulu elingabaziyo;

¹⁴ lizakubuza ngalokhu, likuhlolisise. Uba kuliqiniso, uba kuqinisekile sibili ukuthi into enjalo eyisinengiso yenziwe phakathi kwenu,

¹⁵ bulalani abantu balowomuzi ngomkhonto, liwuchithe impela, lakho konke okukuwo lezinkomo zakhona.

¹⁶ Lizabuthela yonke impango yawo phakathi komdanga wawo, litshise umuzi lempango yawo yonke ngomlilo, kube ngumnikelo wokutshiswa eNkosini uNkulunkulu wenu; uzakuba lunxiwa kokuphela, ungabe usakhiwa futhi.

¹⁷ Lingagcini lutho kwalokho okuqalekisiweyo, ukuba iNkosi iphenduke entukuthelweni yayo evuthayo, ilihawukele, ibe lobubele kini, ilandise, njengalokhu yafunga kubokhokho benu,

¹⁸ uba lilalela ilizwi leNkosi uNkulunkulu wenu, ligcine yonke imithetho yayo engililaya yona lamuhla, lenze okulungileyo emehlweni ayo.