UDutheronomi 11 - iBhayibhili Elingcwele 1978

Ubukhulu beNkosi

¹ Ngakhoke kalibothanda iNkosi uNkulunkulu wenu, ligcine ilizwi layo lezimiso zayo lezahlulelo zayo lemithetho yayo insuku zonke.

² Khumbulani lezizinto lamhla — kangikhulumi ebantwaneni benu abangazaziyo labangazibonanga — khumbulani ukulaya kweNkosi uNkulunkulu wenu, lobukhulu bayo, isandla sayo esilamandla lengalo yayo elamandla,

³ izibonakaliso zayo lezenzo zayo eyazenza eGibithe kuFaro inkosi yaseGibithe, lakulo lonke ilizwe lakhe,

⁴ lalokho eyakwenza empini yaseGibithe, lasemabhizeni ayo lasenqoleni zayo, lokuthi yenza amanzi oLwandle oluBomvu abakhukhele lapho bexotshana lani, yababhubhisa, kuze kube lamuhla.

⁵ Khumbulani lokho eyalilenzela khona enkangala laze lafika kulindawo,

⁶ lalokho eyakwenza kuDathani lakuAbiramu amadodana kaEliyabi indodana kaRubeni, ukuthi umhlaba wavuleka wabaginya bona labendlu zabo, lamathente abo, lakho konke okwabo okuphilayo, phambi kwabo bonke abakoIsrayeli.

⁷ Lizibonele lina zonke izenzo ezinkulu zeNkosi.

Izibusiso zelizwe elithenjisiweyo

⁸ Ngakhoke libogcina yonke imithetho engililaya yona lamhla, ukuba libe lamandla okungena lilithumbe ilizwe eliya kulo ukuba libe ngelenu,

⁹ lokuba lihlale isikhathi eside elizweni iNkosi eyafunga kubokhokho benu ukubanika lona lenzalo yabo, ilizwe eligcwele uchago lenyosi.

¹⁰ Ngoba ilizwe elizakungena kilo ukulithumba kalifanani lelizwe laseGibithe elivela kilo, lapho nxa lalihlanyela inhlanyelo yenu, lalisebenza nzima ukuthelela amasimu;

¹¹ kodwa ilizwe eliya kilo ukulithumba liyilizwe lamaqaqa lezigodi, elinethwa lizulu;

¹² ilizwe elilondolozwa yiNkosi uNkulunkulu wenu, amehlo ayo alikhangela njalo, kusukela ekuqaleni komnyaka kuze kube sekupheleni kwawo.

¹³ Uba lilalela imithetho yami engililaya yona lamuhla, lithande iNkosi uNkulunkulu wenu, liyikhonze ngenhliziyo yenu yonke langomphefumulo wenu wonke,

¹⁴ izakulinika ilizwe lakini izulu ngesikhathi salo, izulu elokuqala lelokucina, ukuba livune amabele enu lewayini lenu lamafutha enu.

¹⁵ Izakunika inkomo zenu utshani emadlelweni; lizakudla, lisuthe.

¹⁶ Qaphelani, funa inhliziyo zenu zikhohliseke, liphambuke, likhonze abanye onkulunkulu, libadumise,

¹⁷ leNkosi ilithukuthelele, ivale izulu ukuba lingani, lelizwe lingabe lisathela isithelo, libhubhe masinyane lina elizweni elihle iNkosi elinika lona.

¹⁸ Ngakhoke gcinani lamazwi ami enhliziyweni yenu lasemphefumulweni wenu, liwabophele ezandleni zenu abe njengophawu, lasemabunzini enu abe yisikhumbuzo.

¹⁹ Lizakuwafundisa abantwana benu, liwatsho lapho lihlezi ezindlini zenu, lalapho lihamba endleleni, lalapho lilala, lalapho livuka.

²⁰ Liwalobe emigubazini yeminyango yezindlu zenu lemasangweni enu,

²¹ ukuba zande insuku zenu lensuku zabantwana benu elizweni iNkosi eyafunga kubokhokho benu ukubanika lona, lapho kusekhona amazulu phezu komhlaba.

²² Uba ligcina kuhle yonke imithetho le engililaya ukuba liyenze, lithande iNkosi uNkulunkulu wenu, lihambe ngendlela zayo zonke, libambelele kuyo,

²³ iNkosi izakuxotsha zonke lezizizwe phambi kwenu, lizinqobe izizwe ezinkulu lezilamandla kulani.

²⁴ Zonke indawo lapho inyawo zenu zinyathela khona zizakuba ngezenu; ilizwe lenu lizakusukela enkangala, laseLebanoni, lasemfuleni iYufrathi, lize lifike olwandle ngasentshonalanga.

²⁵ Kakulamuntu ozamelana lani; iNkosi uNkulunkulu wenu izakubenza abantu belizwe lonke elizakunyathela kulo batshaywe luvalo, balesabe, njengokulithembisa kwayo.

²⁶ Khangelani, lamhla ngiyabeka phambi kwenu isibusiso lesiqalekiso;

²⁷ isibusiso, uba lilalela imithetho yeNkosi uNkulunkulu wenu engililaya yona lamuhla;

²⁸ isiqalekiso, uba lingalaleli imithetho yeNkosi uNkulunkulu wenu, kodwa liphambuka endleleni engililaya yona lamuhla, lilandele abanye onkulunkulu elingabazanga.

²⁹ Kuzakuthi lapho iNkosi uNkulunkulu wenu ilingenisa elizweni eliya ukulithumba, limemezele isibusiso entabeni yaseGerizimi, lesiqalekiso entabeni yaseEbali.

³⁰ Angithi zona ziphetsheya kweJordani ngasentshonalanga kwendlela, elizweni lamaKanani ahlala eAraba, maqondana leGiligali, eduze lezihlahla ezinkulu zaseMore na?

³¹ Ngoba selizakuchapha iJordani ukuba lingene lithumbe ilizwe iNkosi uNkulunkulu wenu elinika lina. Lizakulithumba, lihlale kilo,

³² ligcine kuhle zonke izimiso lezahlulelo engizibeka phambi kwenu lamuhla.