UDutheronomi 1 - iBhayibhili Elingcwele 1978

UMose ulandisa ngokwenzekayo ekuhambeni kwabakoIsrayeli enkangala

¹ La ngamazwi kaMose awakhuluma kubo bonke abakoIsrayeli enkangala ngaphetsheya kweJordani, esihotsheni saseAraba maqondana loLwandle oluBomvu, phakathi kweParani leTofeli leLabani leHazerothi leDizahabi.

² — Kuluhambo lwensuku ezilitshumi lanye kusukela eHorebe kusiva eKadeshi‐Barneya ngendlela yasentabeni yaseSeyiri. —

³ Ngomnyaka wamatshumi amane, ngosuku lokuqala lwenyanga yetshumi lanye uMose wakhuluma labakoIsrayeli njengokulaywa kwakhe yiNkosi,

⁴ esenqobile uSihoni inkosi yamaAmori owayehlala eHeshiboni, loOgi inkosi yaseBashani owayehlala eAshitarothi laseEdreyi.

⁵ Ngaphetsheya kweJordani, elizweni laseMowabi, uMose waqala ukubachasisela lumlayo wathi:

⁶ INkosi uNkulunkulu wethu yathi kithi eHorebe: Sekuyisikhathi eside lihlale kulintaba;

⁷ sukani lapha, liye entabeni zamaAmori, lakubo abakhileyo eAraba, lasezintabeni, lasezikhinsini, laseNegebi, laselizweni elingasolwandle, liye elizweni lamaKanani laseLebanoni kuze kube semfuleni omkhulu iYufrathi.

⁸ Khangelani, ngilivulele ilizwe phambi kwenu. Ngenani, lilithumbe ilizwe iNkosi eyafunga kubokhokho benu, oAbrahama loIsaka loJakobe, ukubanika lona lenzalo yabo emva kwabo.

⁹ Ngalesosikhathi ngalitshela ukuthi: Kangilamandla okulithwala mina ngedwa.

¹⁰ INkosi uNkulunkulu wenu ilandisile, lamhla lingangezinkanyezi zaphezulu ngobunengi.

¹¹ INkosi, uNkulunkulu wabokhokho benu, kayilandise njalo lize libe ngabaphindwe kankulungwane, ilibusise, njengokulithembisa kwayo.

¹² Mina ngedwa ngingathwala kanjani ukukhathaza kwenu lokuswela kwenu lenkani yenu na?

¹³ Khethani kuleso laleso isizwe senu amadoda ahlakaniphileyo, aqondileyo, alolwazi, ngiwabeke abe zinhloko zenu.

¹⁴ Laselingiphendula lisithi: Kuhle ukuba sikwenze lokho okutshoyo.

¹⁵ Ngakhoke ngasengithatha izinhloko zezizwe zenu, amadoda ahlakaniphileyo, alolwazi, ngawabeka aba zinhloko zenu, izinduna zezinkulungwane lezinduna zamakhulu, lezinduna zamatshumi amahlanu, lezinduna zamatshumi, leziphathamandla zezizwe zenu.

¹⁶ Futhi ngabalaya abahluleli benu ngalesosikhathi ngathi: Zwanini izindaba zabafowenu, lahlulele ngokulunga phakathi komuntu lomfowabo, lowezizweni alaye.

¹⁷ Ekwahluleleni kwenu lingabi labandlululo, kodwa zwanini omncinyane njengomkhulu: lingesabi muntu, ngoba ukwahlulela kungokukaNkulunkulu. Lethani kimi indaba ezilahlulayo ukuba ngizizwe.

¹⁸ Ngalesosikhathi ngalilaya ngakho konke okufanele ukuba likwenze.

¹⁹ Sasuka eHorebe, sadabula phakathi kwaleyonkangala enkulu leyesabekayo elayibonayo; sahamba ngendlela eya ezintabeni zamaAmori, njengokusilaya kweNkosi, safika eKadeshiBarneya.

²⁰ Ngasengisithi kini: Selifikile entabeni zamaAmori eyasinika zona iNkosi uNkulunkulu wethu.

²¹ Khangelani, iNkosi uNkulunkulu wenu ilivulile ilizwe phambi kwenu; hambani lilithumbe, njengokulilaya kwayo iNkosi, uNkulunkulu wabokhokho benu; lingesabi, lingakhathazeki.

²² Laselisondela kimi lina lonke lathi: Asithume amadoda ngaphambi kwethu ukuba asihlolele ilizwe, abuye asibikele indlela esimele sihambe ngayo, lemizi esizakungena kuyo.

²³ Lokho kwaba kuhle kimi; ngakho ngathatha kini amadoda alitshumi lambili, kwaba yindodanye kuleso laleso isizwe.

²⁴ Wona ahamba, akhwela ezintabeni aze afika esihotsheni saseEshikoli, asihlola.

²⁵ Abutha ezinye izithelo zalelolizwe, aziletha kithi; asibikela athi: Yilizwe elihle esinika lona iNkosi uNkulunkulu wethu.

²⁶ Kanti lala ukuhamba, lahlamuka emlayweni weNkosi uNkulunkulu wenu,

²⁷ lasola emathenteni enu lathi: Kungoba iNkosi yayisizonda, ngakho yasikhupha elizweni laseGibithe ukusinikela ezandleni zamaAmori ukuba isibhubhise.

²⁸ Sizakuya ngaphi? Abazalwane bethu basithelele ubugwala ngokuthi: Labobantu bakhulu, bade kulathi; lemizi mikhulu, ibiyelwe ngemithangala efika ezulwini; futhi sibonile khona amadodana amaAnaki.

²⁹ Ngasengisithi kini: Lingatshaywa luvalo, lesabe.

³⁰ INkosi uNkulunkulu wenu ehamba phambi kwenu izakulilwela njengalokhu eyalenzela khona eGibithe phambi kwenu,

³¹ lasenkangala, lapho libone khona ukuthi iNkosi uNkulunkulu wenu yalithwala njengomuntu ethwala indodana yakhe, kuyo yonke indlela elahamba ngayo laze lafika lapha.

³² Kodwake, lanxa kunjalo, kalikholwanga iNkosi uNkulunkulu wenu

³³ eyahamba phambi kwenu endleleni ukulidingela indawo ukuba limise kuyo amathente enu; yahamba ngomlilo ebusuku, ukuba ilitshengise indlela elifanele lihambe ngayo, langeyezi emini.

³⁴ INkosi yawezwa amazwi enu yathukuthela, yafunga yathi:

³⁵ Impela kakukho loyedwa wabantu balesisizukulwana esibi ozabona ilizwe elihle engafunga ukulinika okhokho benu,

³⁶ ngaphandle kukaKalebi indodana kaJefune; yena uzakulibona. Ngizamnika yena labantwana bakhe ilizwe anyathela kulo, ngoba ulandele iNkosi ngokupheleleyo.

³⁷ INkosi yangithukuthelela lami ngenxa yenu, yathi: Laweke kawuzukungena kulo;

³⁸ uJoshuwa indodana kaNuni oma phambi kwakho uzakungena; mqinise, ngoba uzakwenza uIsrayeli ukuba alithumbe.

³⁹ Labantwana benu elacabanga ukuthi bazakuba yimpango, abangaziyo okuhle lokubi, bazangena kulo; ngizabanika lona libe ngelabo.

⁴⁰ Kodwa lina phendukani, liqonde enkangala ngendlela eya oLwandle oluBomvu.

⁴¹ Laseliphendula lisithi: Sonile eNkosini; sizahamba siyekulwa, njengokusilaya kwayo iNkosi, uNkulunkulu wethu. Laselihloma lonke izikhali zenu zokulwa; lacabanga ukuthi kulula ukuhlasela ezintabeni.

⁴² INkosi yathi kimi: Batshele uthi: Lingahambi ukuyakulwa, ngoba kangikho phakathi kwenu, ngakho lizanqotshwa yizitha zenu.

⁴³ Ngakhuluma lani sibili, kodwa kalilalelanga; lahlamuka elizwini leNkosi, laziqhenya, laya ezintabeni.

⁴⁴ Kwathi amaAmori ayehlala ezintabeni lezo aphuma alihlasela, alixotsha njengezinyosi, alinqoba eSeyiri, kwaze kwaba seHorma.

⁴⁵ Labuya, lakhala phambi kweNkosi, kodwa iNkosi kayikulalelanga ukukhala kwenu, kayilizwanga.

⁴⁶ Laselihlala eKadeshi insuku ezinengi.