UDanyeli 8 - iBhayibhili Elingcwele 1978

Inqama lempongo

¹ Ngomnyaka wesithathu wokubusa kwenkosi uBelishazari kwabonakala umbono kimi mina Daniyeli, emva kwalowo owabonakala kimi kuqala.

² Ngabona embonweni kungathi ngiseSusa emzini omkhulu welizwe laseElamu; ngabonake embonweni kungathi ngisemfuleni iUlayi.

³ Ngaphakamisa amehlo ami, ngabona inqama imi okhunjini lomfula. Yayilempondo ezimbili, impondo zombili zazinde, olwesibili lulude ukwedlula olunye.

⁴ Ngayibona inqama igqikilela ngasentshonalanga langasenyakatho langaseningizimu; kwakungelanyamazana eyayingema phambi kwayo, kwakungekho muntu ongaphephisa lutho emandleni ayo; yayizenzela santando, yazikhukhumeza.

⁵ Kwathi ngisacabanga, kwaqhamuka impongo ivela ngasentshonalanga idabula wonke umhlaba, inganyatheli phansi. Yayilophondo oluqaphileyo phakathi kwamehlo ayo.

⁶ Yafika enqameni elempondo ezimbili engangiyibone imi okhunjini lomfula, yayisukela ekuthukutheleni kwayo okukhulu.

⁷ Ngayibona isondela enqameni, yayithukuthelela kakhulu, yayidumela, yaphula impondo zayo zombili. Inqama yayingelamandla okuyimela; impongo yayiwisela phansi, yayihlifiza; kwakungekho owayengayophula inqama emandleni ayo.

⁸ Impongo yazikhukhumeza kakhulu; kodwa kwathi isilamandla, uphondo lwayo olukhulu lwephuka, endaweni yalo kwaphuma impondo ezine eziqaphileyo zikhangele ngasemagumbini amane ephezulu.

⁹ Kolunye lwazo kwaphuma uphondo oluncinyane, lwakhula kakhulu, lwatshengisa amandla ayo ngasenginizimu langasempumalanga langaselizweni elihle.

¹⁰ Lwakhula lwaba lukhulu lwaze lwafinyelela ezinkanyezini zaphezulu; lwazidilizela phansi ezinye inkanyezi, lwazinyathela.

¹¹ Lwazikhukhumeza lwaze lwalingana leNkosi yezinkanyezi. Lwamisa iminikelo yayo etshiswa insuku zonke, lwadiliza indlu yayo engcwele,

¹² lwanikela lezinkanyezi; lwafaka okubi esikhundleni somnikelo, lwaphosela phansi iqiniso, luphumelela kukho konke.

¹³ Ngasengisizwa isithunywa sikhuluma, lesinye esathi kuleso esikhulumayo: Koze kube nini lumbono usiba khona owomnikelo otshiswa insuku zonke na? Koze kube nini isono esichithayo sisenziwa na? Koze kube nini kuyekelwa indawo engcwele lezinkanyezi ukuba zinyathelwe phansi na?

¹⁴ Sathi kuso: Kuzaze kube yizikhathi zokuhlwa lezokusa eziyizinkulungwane ezimbili lamakhulu amathathu zokunikelwa kweminikelo; besekulungiswa indawo engcwele.

¹⁵ Kwathi sengiwubonile umbono, mina Daniyeli, ngazama ukuwuqedisisa. Kwasekusima phambi kwami othile olesimo somuntu.

¹⁶ Ngezwa ilizwi lomuntu phakathi komfula iUlayi, limemeza lisithi: Gabriyeli, yenza lumuntu ukuba awuqedisise umbono.

¹⁷ UGabriyeli wasesondela lapho ngimi khona. Esefikile ngatshaywa luvalo, ngathi mbo ngobuso phansi. Kodwa yena wathi kimi: Ndoda, qedisisa ukuba umbono ungowesikhathi sokucina.

¹⁸ Kwathi esakhuluma lami, ngaqaleka ngawela phansi; kodwa wangithinta, wasengiphakamisa engimisa ngenyawo.

¹⁹ Wathi: Ngizakukutshela okuzakwenzakala ekupheleni kwentukuthelo, ngoba lokho kungokwesikhathi sokucina.

²⁰ Mayelana lenqama oyibonileyo ilempondo ezimbili, zona zingamakhosi aseMede lamaPerisiya.

²¹ Impongo iyinkosi yamaGriki, lophondo olukhulu phakathi kwamehlo ayo luyinkosi yokuqala.

²² Uphondo olwephukayo, okwakhula impondo ezine endaweni yalo, lokhu kuyimibuso emine ezavela esizweni sayo, kodwa ingabi lamandla ayo.

²³ Ensukwini zokucina zaleyomibuso, lapho izono zayo sezizinkulu, kuzavela inkosi elolunya elukhuni lekhohlisayo.

²⁴ Izakuba lamandla amakhulu, ilethe ukuchitheka okwesabekayo, iphumelele kulokho ekwenzayo, ichithe amaqhawe labantu babangcwele.

²⁵ Ngobuqili bayo izakwenza inkohliso iphumelele, izikhukhumeze engqondweni yayo, ichithe abanengi ngokubajuma, ize imelane leNkosi yamakhosi, kodwa izaphohlozwa kungesikho ngezandla zomuntu.

²⁶ Umbono wezikhathi zokuhlwa lezokusa osulandisiwe uliqiniso. Kodwa kawube yimfihlo, ngoba ungowensuku ezinengi ezizayo.

²⁷ Mina Daniyeli, ngasengiphela amandla, ngagula insuku ezithile; ngavuka ngenza umsebenzi wenkosi, kodwa ngamangaliswa yilowombono, kangaze ngawuqedisisa.