UDanyeli 7 - iBhayibhili Elingcwele 1978

Iphupho likaDaniyeli ngezilo ezine

¹ Ngomnyaka wokuqala kaBelishazari, inkosi yaseBabiloni, uDaniyeli waphupha iphupho, wabona lemibono ngengqondo yakhe esalele embhedeni wakhe. Waseligwala iphupho, waqalisa

² wathi: Ngabona embonweni wami ebusuku imimoya evela inxa zonke, iqubula ulwandle olukhulu.

³ Kwaphuma olwandle izilo ezine ezinkulu ezingafananiyo.

⁴ Esokuqala sasifana lesilwane, silempiko zenkozi. Kwathi lapho ngisakhangele, impiko zaso zephulwa, saphakanyiswa emhlabathini, samiswa ngenyawo ezimbili njengomuntu, sanikwa ingqondo yomuntu.

⁵ Isilo sesibili sasifana lebhere. Sasiquthile silembambo ezintathu emlonyeni waso phakathi kwamazinyo aso. Kwathiwa kuso: Vuka, udle inyama enengi.

⁶ Emva kwalokho ngakhangela, ngabona esinye esifana lengwe, silempiko ezine zenyoni emhlana waso, silamakhanda amane, sanikwa amandla okubusa.

⁷ Emva kwalokho ngabona emibonweni ebusuku isilo sesine, esesabekayo kakhulu, silamandla amakhulu, silamazinyo amakhulu ensimbi, sadla safohloza, lokuseleyo sakuhlifiza ngenyawo. Sasehlukile kuzo zonke izilo ezazingaphambi kwaso, silempondo ezilitshumi.

⁸ Ngisazikhangele impondo, kwaphuma olunye phakathi kwazo, oluncinyane; kwasekusitshunwa ezintathu ezokuqala ukulucentela indawo. Lwalulamehlo afana lawomuntu, lomlomo okhuluma amazwi okuzincoma.

⁹ Ngisakhangele, kwabekwa izihlalo zobukhosi, kwahlala oyisimakade; izambatho zakhe zazimhlophe njengongqoqwane, lenwele zekhanda lakhe zinjengoboya bezimvu obuhlambulukileyo; isihlalo sakhe sobukhosi singamalangabi omlilo, lamavili aso enjengomlilo ovuthayo.

¹⁰ Kwavela umkhonjwana womlilo, waphumela ngaphambi kwakhe. Inkulungwane zezinkulungwane zamkhonza, lezinkulungwane ezilitshumi zezinkulungwane ezilitshumi zema phambi kwakhe. Kwaba lokwahlulela, lezincwadi zavulwa.

¹¹ Ngasengikhangela ngenxa yomsindo wamazwi okuzincoma ayekhulunywa luphondo. Ngisakhangele, isilo sabulawa, lomzimba waso wachithwa, wanikelwa ukutshiswa ngomlilo.

¹² Kodwa ezinye izilo ukubusa kwazo kwathathwa, kodwa ukuphila kwazo kwelulwa okwesikathi esithile.

¹³ Ngabona emibonweni ebusuku kufika lamayezi aphezulu ofanana lendodana yomuntu, wafika koyisimakade, wasondezwa phambi kwakhe.

¹⁴ Wanikwa amandla okubusa, lodumo, lombuso, ukuba bonke abantu bezizwe lezindimi bamkhonze. Ukubusa kwakhe kakulakuphela, kakuyikudlula, lombuso wakhe uyilowo ongayikuchithwa.

¹⁵ Mina Daniyeli, umoya wami wakhathazeka, lemibono yengqondo yami yangethusa.

¹⁶ Ngasondela komunye walabo abemi lapho, ngambuza iqiniso ngakho konke lokhu. Wasengitshela, wangibonisa incazelo yalezozinto.

¹⁷ Wathi: Lezizilo ezine ezinkulu zingamakhosi amane azavela emhlabeni.

¹⁸ Kodwa abangcwele boPhezukonke bazakwamukeliswa umbuso, ube ngowabo kuze kube nininini.

¹⁹ Ngasengithanda ukwazi iqiniso mayelana lesilo sesine esasehlukile kwezinye zonke, sisesabeka kakhulu, silamazinyo ensimbi lenzipho zethusi, esadla safohloza, sahlifiza okuseleyo ngenyawo zaso.

²⁰ Futhi ngathanda ukwazi langempondo ezilitshumi ezazisekhanda laso, langolunye uphondo okwathi ekuphumeni kwalo zawa ezintathu, uphondo olwalulamehlo lomlomo owakhuluma amazwi okuzincoma, olwakhanya lulukhulu kulezinye.

²¹ Ngisakhangele, loluphondo lwalwa labangcwele, lwabanqoba,

²² kwaze kwafika oyisimakade, wabahlulela abangcwele boPhezukonke; kwafika isikhathi sokuba abangcwele bamukeliswe umbuso.

²³ Wangiphendula wathi: Isilo sesine sizakuba ngumbuso wesine emhlabeni, ozakwehluka kuyo yonke imibuso; uzachitha wonke umhlaba, uwuhlifize, uwufohloze.

²⁴ Impondo ezilitshumi zingamakhosi alitshumi azavela kulowombuso. Kuzavela enye emva kwawo, yona izakwehluka kwawokuqala, izachitha amakhosi amathathu.

²⁵ Izakhuluma kubi ngoPhezukonke, ihluphe abangcwele boPhezukonke. Izanakana ukuguqula izikhathi zemikhosi lomlayo. Abangcwele bazanikelwa esandleni sayo, iminyaka emithathu lengxenye.

²⁶ Kuzakuba lokwahlulelwa, kususwe ukubusa kwayo, kuqedwe kuchithwe nya.

²⁷ Amandla lobukhulu bemibuso yonke engaphansi komthunzi welanga kuzanikwa abantu abangcwele boPhezukonke. Ukubusa kwabo kakuyikuphela, layo yonke imibuso izakubakhonza ibalalele.

²⁸ Iphelela lapha indaba. Mina Daniyeli, imicabango yami yangethusa kakhulu, kwaphenduka lebala lami. Ngakugcina kwaba yimfihlo.