UDanyeli 6 - iBhayibhili Elingcwele 1978

UDaniyeli usemgodini wezilwane

¹ Kwaba kuhle kuDariyu ukubeka embusweni wakhe wonke izikhulu ezilikhulu lamatshumi amabili.

² Phezu kwazo wamisa abongameli abathathu, omunye wabo enguDaniyeli, ukuba izikhulu zibike kubo ukuze inkosi ingalahlekelwa lutho.

³ UDaniyeli lowo wabedlula bonke abongameli lezikhulu zonke, ngoba wayelomoya omuhle. Inkosi yazimisela ukumbeka phezu kwawo wonke umbuso.

⁴ Abongameli lezikhulu basebefuna ulutho uDaniyeli abangamsola ngalo mayelana lombuso; kodwa behluleka ukuzuza ulutho abangamsola ngalo lokuzuza icala, ngoba wayethembekile engelaso isiphosiso lecala.

⁵ Lawomadoda asesithi: Singeke sifumane ulutho esingamsola ngalo uDaniyeli ngaphandle kokuba silufumane mayelana lomlayo kaNkulunkulu wakhe.

⁶ Ngakhoke labobongameli lezikhulu bavumelana ukuya enkosini, bathi kuyo: Bayethe wena nkosi Dariyu!

⁷ Bonke abongameli bombuso, lezinduna, lezikhulu, labeluleki, lababusi, bavumelene ukuba inkosi imise umthetho, ikhuphe isimemezelo esiqinileyo ngawo sokuthi lowo okhuleka komunye unkulunkulu loba omunye umuntu ensukwini ezingamatshumi amathathu ezizayo ngaphandle kwakho, nkosi, uzaphoselwa emgodini wezilwane.

⁸ Khathesike, wena nkosi, misa lumlayo ngokuwugwala kulincwadi ukuze ungaguqulwa, ngoba umthetho wamaMede lamaPerisiya kawuguquki.

⁹ Ngakhoke inkosi uDariyu wasegwala encwadini, wamisa umthetho.

¹⁰ Lapho uDaniyeli asesazi ukuthi inkosi isigwalile encwadini, wangena endlini yakhe; amawindi endlu yakhe ephezulu ayekhangele iJerusalema. Waguqa kathathu ngosuku ekhuleka edumisa uNkulunkulu wakhe njengokwenza kwakhe insuku zonke.

¹¹ Asesiza wonke lawomadoda, amfumana uDaniyeli ekhuleka ecela kuNkulunkulu wakhe.

¹² Asesiza enkosini, ayikhumbuza umthetho athi: Wena nkosi, kawulobanga yini umthetho wokuthi lowomuntu okhuleka komunye unkulunkulu loba omunye umuntu ensukwini ezingamatshumi amathathu ezizayo ngaphandle kwakho, wena nkosi, uzaphoselwa emgodini wezilwane na? Inkosi yaphendula yathi: Lokhu kumisiwe ngomthetho wamaMede lamaPerisiya ongelakuguqulwa.

¹³ Asephendula enkosini esithi: UDaniyeli lowo ongomunye wabathunjiweyo bakoJuda kakunanzi, wena nkosi, lomthetho owulobileyo, kodwa uyakhuleka kunkulunkulu wakhe kathathu ngosuku.

¹⁴ Lapho inkosi isizwile lawomazwi yaba losizi kakhulu, yadinga indlela yokumkhulula uDaniyeli. Yanakana ngokumophula laze latshona ilanga.

¹⁵ Asesiza enkosini lawomadoda, athi kuyo: Nkosi, khumbula ukuba kungumthetho wamaMede lamaPerisiya ukuthi kakulamlayo lomthetho omiswa yinkosi ongaguqulwa.

¹⁶ Inkosi yasilaya ukuba uDaniyeli alethwe, aphoselwe emgodini wezilwane. Yathi kuDaniyeli: Kungathi uNkulunkulu wakho omkhonzayo njalonjalo angakukhulula!

¹⁷ Kwasekulethwa ilitshe, labekwa emlonyeni womgodi, lenkosi yalinameka ngophawu lwayo langophawu lwezikhulu zayo ukuba isiqumo mayelana loDaniyeli singaguqulwa.

¹⁸ Inkosi yasisiya endlini yayo, yazila ukudla ngalobobusuku; kakulethwanga sifazana kuyo, yaswela lobuthongo.

¹⁹ Inkosi yavuka emadabukakusa, yaya ngokuphangisa emgodini wezilwane.

²⁰ Ekufikeni kwayo emgodini lapho wayekhona uDaniyeli, yamemeza ngelizwi elibuhlungu, yathi kuDaniyeli: We Daniyeli, nceku kaNkulunkulu ophilayo, uNkulunkulu wakho omkhonzayo njalonjalo ukusilisile yini ezilwaneni?

²¹ UDaniyeli wasesithi enkosini: Bayethe nkosi!

²² UNkulunkulu wami uthumile isithunywa sakhe, savala imilomo yezilwane, kazingilimazanga, ngoba ngifunyaniswe ngingelacala phambi kwakhe; laphambi kwakho, nkosi, kangonanga lutho.

²³ Inkosi yasithokoza kakhulu, yalaya ukuba uDaniyeli akhutshwe emgodini. Ngakho uDaniyeli wasekhutshwa emgodini, wafunyanwa engalimalanga, ngoba wayethembe kuNkulunkulu wakhe.

²⁴ Inkosi yasilaya ukuba kulethwe lawomadoda ayemmangelele uDaniyeli, aphoselwe emgodini wezilwane, wona labantwana bawo labomkawo. Kwathi bengakafiki ekucineni komgodi, izilwane zabaqaga, zafohloza wonke amathambo abo, aba yizicucu.

²⁵ Inkosi uDariyu yasilobela bonke abantu bezizwe zonke lezindimi zonke ezihlala emhlabeni wonke, yathi: Ukuthula kakwande kini.

²⁶ Ngiyamisa umthetho ukuthi kuwo wonke amazwe asembusweni wami abantu kabathuthumele bamesabe uNkulunkulu kaDaniyeli. Ngoba unguNkulunkulu ophilayo, lohlala kuze kube nininini. Umbuso wakhe kawuyikuchithwa, lokubusa kwakhe kuzakuma kuze kube sekupheleni.

²⁷ Uyakhulula, ophule, enze izibonakaliso lezimangaliso ezulwini lasemhlabeni, yena umkhulule uDaniyeli emandleni ezilwane.

²⁸ Ngakhoke uDaniyeli waphumelela esikhathini sonke sokubusa kukaDariyu lesokubusa kukaKurosi umPerisiya.