UDanyeli 5 - iBhayibhili Elingcwele 1978

Umbhalo obhalwa emdulini

¹ Inkosi uBelishazari wenzela izikhulu zakhe eziyinkulungwane idili elikhulu, wanatha iwayini kanye lazo.

² UBelishazari esalikholisa iwayini walaya ukuba kulethwe izitsha zegolide lezesiliva uNebukadineza uyise ayezithethe ethempelini eJerusalema, ukuba inkosi lezikhulu zayo labomkayo labanye abafazi bayo banathele kizo.

³ Basebeziletha izitsha zegolide lezesiliva ezazithethwe ethempelini, endlini kaNkulunkulu eJerusalema; inkosi lezikhulu zayo labomkayo labanye abafazi bayo banathela kizo.

⁴ Banatha iwayini, badumisa onkulunkulu begolide labesiliva labethusi labensimbi labesigodo labelitshe.

⁵ Kwahle kwavela iminwe yesandla somuntu, yabhala emdulini obhadiweyo wesigodlo senkosi maqondana loluthi lwesibane; inkosi yasibona isandla sibhala.

⁶ Yasiphenduka ibala layo, lemicabango yayo yayethusa, kwaxega izitho zayo, kwatshayana amadolo ayo.

⁷ Yamemeza ukuba kulethwe izangoma lamaKaladiya labafunda okutshiwo zinkanyezi. Yathi kulababahlakaniphileyo baseBabiloni: Lowo ofunda lumbhalo, angitshele incazelo yawo, uzagqokiswa okuyibubende, agqiziswe iketane legolide entanyeni yakhe, abe ngumbusi wesithathu embusweni.

⁸ Basebengena bonke abahlakaniphileyo benkosi, kodwa behluleka ukuwubala umbhalo lokutshela inkosi incazelo yawo.

⁹ Inkosi uBelishazari yethuka kakhulu, lebala layo laphenduka, lezikhulu zayo zadideka.

¹⁰ Inkosikazi isizwa amazwi enkosi lawezikhulu zayo yangena endlini yedili, yathi: Bayethe nkosi! Imicabango yakho kayingakwethusi, lebala lakho lingaphenduki.

¹¹ Kukhona embusweni wakho umuntu olomoya wabonkulunkulu abangcwele. Ensukwini zikayihlo kwafunyaniswa kuye ukukhanya lokuqedisisa lokuhlakanipha, ukuhlakanipha okufanana lokwabonkulunkulu, loyihlo inkosi uNebukadineza wambeka waba yinduna yezanuse lezangoma lamaKaladiya labafunda okutshiwo zinkanyezi,

¹² ngoba kwafunyaniswa kulowomuntu othiwa nguDaniyeli, inkosi eyambiza ngokuthi nguBeliteshazari, umoya omuhle, lokwazi, lokuqedisisa ukuchaza amaphupho, lokuchasisa imizekeliso, lokulungisa izindaba ezilukhuni. Ake abizwe uDaniyeli, azekutsho incazelo yalo.

¹³ UDaniyeli waselethwa phambi kwenkosi; inkosi yathi kuDaniyeli: O nguwe Daniyeli, omunye wabathunjwayo koJuda, inkosi ubaba eyamthatha koJuda.

¹⁴ Sengizwile ngawe ukuba umoya wabonkulunkulu ukuwe, lokuba ukukhanya lokuqedisisa lokuhlakanipha okuhle kukhona kuwe.

¹⁵ Abahlakaniphileyo lezangoma balethiwe phambi kwami ukuba bawufunde lumbhalo, bangitshele incazelo yawo. Kodwa behlulekile ukungitshela incazelo yendaba.

¹⁶ Kodwa ngizwile ukuthi wena ulamandla ukutsho izincazelo lokulungisa indaba ezilukhuni. Ngakhoke uba ungafunda lumbhalo, ungitshele incazelo yawo, uzagqokiswa okuyibubende, ugqiziswe iketane legolide entanyeni yakho, ube ngumbusi wesithathu embusweni.

¹⁷ UDaniyeli wasephendula phambi kwenkosi wathi: Zigcinele izipho zakho, unike omunye umvuzo wakho. Kodwa ngizayifundela inkosi umbhalo, ngiyitshele incazelo yawo.

¹⁸ Nkosi, uNkulunkulu oPhezukonke, wanika uNebukadineza uyihlo ubukhosi lobukhulu lodumo lombuso.

¹⁹ Ngenxa yobukhulu amnika bona bonke abantu bezizwe lezindimi bathuthumela besaba phambi kwakhe; wambulala ayethanda ukumbulala, wamyekela ayethanda ukuba aphile, wamphakamisa ayethanda ukumphakamisa, wamehlisa ayethanda ukumehlisa.

²⁰ Kodwa lapho inhliziyo yakhe isizikhukhumeza, lomoya wakhe ususiba lukhuni waze wazigqaja, wakhutshwa esihlalweni sakhe sobukhosi, kwasuswa lodumo lwakhe.

²¹ Waxotshwa ebantwini, lengqondo yakhe yenziwa yafanana leyenyamazana, wahlala labobabhemi beganga, wadla utshani njengenkomo, lomzimba wakhe wathanjiswa ngamazolo aphezulu, waze wazi ukuthi uNkulunkulu oPhezukonke uyabusa umbuso wabantu, abeke kuwo lowo athanda ukumbeka.

²² Wena Belishazari, indodana yakhe, kawuyithobanga inhliziyo yakho lanxa ukwazi konke lokhu,

²³ kodwa umelene leNkosi yaphezulu; kwalethwa lezitsha zendlu yayo phambi kwakho; wena lezikhulu zakho labomkakho labanye abafazi bakho lanathela kuzo iwayini. Wadumisa onkulunkulu besiliva labegolide labethusi labensimbi labezigodo labamatshe, abangaboniyo labangezwayo labangaziyo; kodwa uNkulunkulu ophethe ngesandla sakhe umphefumulo wakho lezindlela zakho zonke ezingezakhe kawumdumisanga.

²⁴ Ngenxa yalokho wathumela isandla esabhala lumbhalo.

²⁵ Nanku umbhalo owabhalwayo: Mene, Mene, Tekeli, Parisini.

²⁶ Nansi incazelo yendaba; Mene, kutsho ukuthi uNkulunkulu uzibalile insuku zombuso wakho, uwuqedile.

²⁷ Tekeli, kutsho ukuthi wena ulinganisiwe ngezilinganiso, ufunyenwe ulula.

²⁸ Parisini, kutsho ukuthi umbuso wakho wahlukanisiwe, wanikwa amaMede lamaPerisiya.

²⁹ UBelishazari waselaya ukuba uDaniyeli agqokiswe okuyibubende, agqiziswe iketane legolide entanyeni yakhe, kwenziwa isimemezelo ngaye sokuba abe ngumbusi wesithathu embusweni.

³⁰ Ngabona lobobusuku uBelishazari inkosi yamaKaladiya wabulawa.

³¹ UDariyu umMede wathatha umbuso eleminyaka engamatshumi ayisithupha lambili.