UDanyeli 12 - iBhayibhili Elingcwele 1978

Isikhathi sokucina

¹ Ngalesosikhathi kuzavela uMikayeli, umbusi omkhulu olinda abantu bakini. Kuzakuba khona isikhathi sokuhlupheka esingazanga sibe khona kusukela ekuqaleni kwezizwe kuze kube ngalesosikhathi. Kodwa ngalesosikhathi bazakhululwa abantu bakini, bonke abalotshiweyo ogwalweni.

² Labanengi abaleleyo othulini lomhlaba bazavuka, abanye bavukele ukuphila okungapheliyo, labanye bavukele ihlazo lokuhlekwa okungapheliyo.

³ Abahlakaniphileyo bazakhanya njengokukhanya kwesibhakabhaka, lalabo abaphendulela abanengi ekulungeni bakhanye njengezinkanyezi kuze kube nininini.

⁴ Kodwa, wena Daniyeli, vala amazwi, unameke incwadi, kuze kube sesikhathini sokuphela. Abanengi bazazula baye le lale, lobubi buzabalokhu busanda.

⁵ Ngasengikhangela, mina Daniyeli, ngabona ababili bemi, omunye enganeno komfula lomunye engaphetsheya.

⁶ Ngathi kulowomuntu ogqoke ilembu elihle, owayemi ngaphezu komfula: Kuzakuba nini ukuphela kwalezizimangaliso na?

⁷ Lowomuntu ogqoke ilembu elihle, owayemi ngaphezu komfula, waphakamisela isandla sokunene lesandla sakhe sokhohlo phezulu; ngamuzwa efunga ngalowo ophila kuze kube nininini ukuba kuzakuba ngokweminyaka emithathu lengxenye. Lapho sekuphelile ukufohlozwa kwamandla abantu abangcwele, zonke lezizinto zizaphela.

⁸ Ngezwa, kodwa kangiqedisisanga. Ngasengisithi: Nkosi yami, kuzakuba yini ukuphela kwalezizinto na?

⁹ Wathi: Hamba kuhle, Daniyeli, ngoba amazwi avaliwe, ananyekwa kuze kube yisikhathi sokuphela.

¹⁰ Abanengi bazazihlambulula, bazenze babe mhlophe, balungiswe; kodwa ababi bazakwenza kubi, kungabi khona loyedwa wababi oqedisisayo; kodwa labo abahlakaniphileyo bazaqedisisa.

¹¹ Kusukela esikhathini sokususwa komnikelo otshiswa insuku zonke, lamanyala aletha ukuchitheka esemisiwe, kuzakuba zinsuku eziyinkulungwane lamakhulu amabili lamatshumi aficamunwemunye.

¹² Ubusisiwe olindayo aze afinyelele ensukwini eziyinkulungwane lamakhulu amathathu lamatshumi amathathu lanhlanu.

¹³ Hambake kuze kube sekupheleni; usuphumule, uzavuka ukuba uzuze okufaneleyo ekupheleni kwesikhathi.