UDanyeli 11 - iBhayibhili Elingcwele 1978

¹ Minake, ngomnyaka wokuqala kaDariyu umMede, ngema ukumqinisa ukuba abe lamandla.

Inkosi yasenyakatho leyaseningizimu

² Khathesi ngizakukutshela. Kusezakuvela amakhosi amathathu ePerisiya; eyesine izanotha ukwedlula wonke. Kuthi lapho isiqinile ngenxa yenotho yayo, izimisele ukulwa lombuso wamaGriki.

³ Besekuvela inkosi elamandla ezabusa umbuso omkhulu, yenze ekuthandayo.

⁴ Izakwanela ukuvela nje, umbuso wayo uchithwe wahlukaniswe izigaba ezine, kodwa unganikwa inzalo yayo, ungabuswa njengokubusa kwayo. Ngoba umbuso wayo uzasitshunwa, unikwe abanye ngaphandle kwalaba.

⁵ Inkosi yaseningizimu izakuba lamandla, kodwa omunye wababusi bayo uzakuba lamandla ukuyedlula, abe lombuso omkhulu.

⁶ Emva kweminyaka izakwenza isivumelwano, inkosi yaseningizimu yendisele indodakazi yayo enkosini yasenyakatho ukuba enze isivumelwano sokuthula; kodwa kasiyikuma, yona kanye lezinceku zayo eyafika lazo, lomntwana wayo, lomkayo bazabulawa.

⁷ Ngalezozikhathi kuzavela olihlumela empandeni zaleyondodakazi athathe indawo yenkosi. Uzakuyihlasela impi yenkosi yasenyakatho, angene enqabeni yayo, alwe labantu bayo, abehlule.

⁸ Uzakuthumbela eGibithe onkulunkulu babo, lezithombe zabo zensimbi, lezitsha zabo eziligugu ezesiliva lezegolide. Okweminyaka eminengi kayikuba asayihlasela inkosi yasenyakatho.

⁹ Yonake ibisihlasela umbuso wenkosi yaseningizimu, kodwa ibuyele futhi elizweni layo.

¹⁰ Amadodana ayo azahloma abuthe izimpi ezinkulu; enye izakhukhula yedlule, ilwe ize ifike enqabeni yayo.

¹¹ Inkosi yaseningizimu izakuthukuthela, iphume ukulwa lenkosi yasenyakatho, ibuthe impi enkulu, kodwa izanikelwa esandleni sesitha sayo.

¹² Lapho impi isithunjiwe, inhliziyo yayo izaziphakamisa, ibulale amatshumi ezinkulungwane, kodwa kayiyikunqoba.

¹³ Inkosi yasenyakatho ibuye ibuthe futhi impi enkulu kuleyokuqala; kuthi ngemva kweminyaka ethile ifike lempi enkulu lempahla ezinengi.

¹⁴ Ngalezozikhathi abanengi bazayivukela inkosi yaseningizimu. Abantu abalesihluku phakathi kwabantu bakini bazakuvuka ukuba bagcwalise umbono, kodwa behluleke.

¹⁵ Inkosi yasenyakatho ibisifika, yakhe idundulu lokuvimbezela, iwuthathe umuzi obiyelweyo. Impi yaseningizimu izakwehluleka ukulwa kanye lamabutho ayo akhethiweyo, izaswela amandla.

¹⁶ Kodwa ehlaselayo izakwenza ekuthandayo, kungabi khona loyedwa oyimelayo. Izakuma elizweni elihle, lonke libe sesandleni sayo.

¹⁷ Izakuzimisela ukunqoba wonke umbuso wenkosi yaseningizimu, yenze isivumelwano layo, iyendisele indodakazi yayo ukuze kuchitheke umbuso wayo; kodwa lokhu kakuyikuphumelela.

¹⁸ Emva kwalokho izaphendukela ngasemazweni angasolwandle, iwanqobe amanengi awo; kodwa induna yezizweni izakukuqeda lokhu ukuzikhukhumeza kwayo, ikuphendule kube lihlazo.

¹⁹ Izaphenduka ibuyele ezinqabeni zelizwe layo, kodwa izakwahlulwa, ingaphindi ibonwe futhi.

²⁰ Esikhundleni sayo kuzavela enye inkosi ezathuma umthelisi ukuthelisa abantu abacindezele; kodwa ngensuku ezilutshwana izabulawa, kungesikho obala loba empini.

²¹ Esikhundleni sayo kuzavela umuntu odelelekileyo ongabunikwanga ubukhosi, afike kungananzelelwe, awuthathe umbuso ngokukhohlisa.

²² Izimpi uzazikhukhula phambi kwakhe, azibhubhise, kanye lesikhulu sesivumelwano.

²³ Kusukela esikhathini sokwenziwa kwesivumelwano laye uzasebenza ngobuqili, aqine abe lamandla elabantu abalutshwana.

²⁴ Uzanqoba izindawo ezinothileyo zombuso, enze okungenziwanga ngokhokho bakhe, abele abalandeli bakhe impango lokuthunjiweyo lempahla; enze amacebo okuhlasela inqaba, kodwa kube ngokwesikhatshana nje.

²⁵ Uzasukela inkosi yaseningizimu ngamandla langesibindi elempi enkulu; inkosi yaseningizimu ilwe laye ilempi enkulu elamandla; kodwa kayiyikuma, ngoba abantu bazakuyenzela amacebo.

²⁶ Lalabo abadla ukudla kwayo okumnandi bazayibhubhisa, impi yayo ikhukhulwe, kubulawe abanengi.

²⁷ Amakhosi amabili esidla ndawonye azakwenza amacebo, akhohlisane, kodwa kungawasizi. Kodwa ukuphela kuzafika ngesikhathi esimisiweyo.

²⁸ Uzabuyela elizweni lakhe elempahla enengi, kodwa inhliziyo yakhe imelane lesivumelwano esingcwele, enze akufunayo, abesebuyela elizweni lakhe.

²⁹ Ngesikhathi esimisiweyo uzabuya ahlasele iGibithe; kodwa kakuyikuba njengakuqala.

³⁰ Imikolo yamaRoma izakumhlasela, abesesesaba, abuyele emuva; uzabuyela ethukuthele, asukelane lesivumelwano esingcwele. Uzabuya asekele labo abadele isivumelwano esingcwele.

³¹ Izimpi zakhe zizafika zingcolise ithempeli lenqaba, zisuse umnikelo otshiswa insuku zonke, zimise amanyala aletha ukuchitheka.

³² Uzakubakhohlisa ngokubabamba amehlo labo abephula isivumelwano; kodwa abantu abamaziyo uNkulunkulu wabo bazakuma baqine, balwe.

³³ Abahlakaniphileyo babantu bazafundisa abanengi, lanxa bezabulawa empini langomlilo, babanjwe, bathunjwe okwensuku ezithile.

³⁴ Ekubulaweni kwabo bazasizwa kancinyane, loba abanengi balabo abazihlanganisa labo bengelaqiniso.

³⁵ Abanye babahlakaniphileyo bazabulawa ukuze abanye bahlolwe, bahlanjululwe, benziwe babe mhlophe, kuze kufike isikhathi sokuphela, ngoba kungokwesikhathi esimisiweyo.

³⁶ Inkosi izakwenza ekuthandayo; izaziphakamisa izikhulise ngaphezu kwabo bonke onkulunkulu, ikhulume okumangalisayo ngoNkulunkulu, iphumelele kuze kuphelele intukuthelo, ngoba okumisiweyo kuzakwenziwa.

³⁷ Kayiyikunanza onkulunkulu babokhokho bayo lonkulunkulu othandwa ngabesifazana; kayiyikunanza loyedwa unkulunkulu, ngoba izazikhulisa ibe phezu kwabo bonke.

³⁸ Izadumisa unkulunkulu wezinqaba; unkulunkulu owayengaziwa ngokhokho bakhe izamdumisa ngegolide langesiliva, langamatshe amahle, langeziphiwo ezibiza imali enengi.

³⁹ Izagcwalisa inqaba zayo eziqinileyo ngabantu bezizweni, abantu abakhonza unkulunkulu wezizweni; labo abayivumayo ibanike udumo, ibenze ababusi phezu kwabanengi, ibanike umvuzo wamazwe.

⁴⁰ Ngesikhathi sokuphela inkosi yaseningizimu izakuyihlasela; kodwa inkosi yasenyakatho izayisukela njengesivunguzane ilezinqota zokulwa, labagadi bamabhiza, lemikolo eminengi, ihlasele amazwe, ikhukhule, idlule.

⁴¹ Izangena elizweni elihle, ibulale amatshumi azinkulungwane; kodwa iEdoma leMowabi lengxenye enkulu yabaseAmoni bazaphunyuka esandleni sayo.

⁴² Izaphakamisela isandla sayo emazweni, lelizwe laseGibithe kaliyikuphepha.

⁴³ Izathatha inotho yegolide leyesiliva lazo zonke izinto eziligugu zaseGibithe; amaLibiya lamaEtiyopiya azayikhonza.

⁴⁴ Kodwa izakwethuswa yimibiko evela empumalanga lasenyakatho, iphume ngokuthukuthela okukhulu ukuqeda lokubhubisa abanengi, baphele nya.

⁴⁵ Izamisa amathente ayo obukhosi phakathi kolwandle lentaba enhle engcwele. Kodwa izakufa, kungekho ongayisiza.