UDanyeli 1 - iBhayibhili Elingcwele 1978

Ukufundiswa kukaDaniyeli labangane bakhe esigodlweni sikaNebukadineza

¹ Ngomnyaka wesithathu wokubusa kukaJehoyakimi inkosi yakoJuda, uNebukadineza inkosi yaseBabiloni wafika eJerusalema, walivimbezela.

² INkosi uNkulunkulu yanikela uJehoyakimi inkosi yakoJuda esandleni sakhe, lengxenye yezitsha zendlu kaNkulunkulu. UNebukadineza wazisa elizweni laseShinari, endlini kankulunkulu wakhe, wazibeka endlini yenotho.

³ Waselaya uAshipenazi induna yabathenwa bayo ukuba ilethe ingxenye yabantu bakoIsrayeli, abozalo lwesikhosini kanye lezikhulu,

⁴ abangamajaha angelasici, abukekayo, ahlakaniphileyo, alolwazi, akwaziyo ukufunda, lalamandla okusebenza esigodlweni senkosi, bafundiswe izincwadi lolimi lwamaKaladiya.

⁵ Inkosi yabamisela isabelo sokudla kwabo kwensuku zonke, okumnandi okudliwa yinkosi, lewayini elinathayo. Babezafundiswa iminyaka emithathu, kuthi ekupheleni kwayo balethwe enkosini ukuyisebenzela.

⁶ Phakathi kwabo kwakukhona oDaniyeli loHananiya loMishayeli loAzariya, abesizwe sakoJuda.

⁷ Induna yabathenwa yabatha amanye amabizo; uDaniyeli yathi nguBeliteshazari, loHananiya yathi nguShadraki, loMishayeli yathi nguMeshaki, loAzariya yathi nguAbedinego.

⁸ Kodwa uDaniyeli wazimisela ukuba angazingcolisi ngokudla kwenkosi okumnandi, langewayini eyayilinatha. Ngakhoke wasecela induna yabathenwa ukuba imvumele angazingcolisi.

⁹ UNkulunkulu wamnika uDaniyeli umusa lesihawu enduneni yabathenwa;

¹⁰ induna yabathenwa yathi kuDaniyeli: Ngiyesaba ukuthi inkosi yami elimisele ukudla lokunathwayo izakubona ukuba wena ucakile kulamanye amajaha ayintanga yakho; ubusungifaka engozini yokubulawa yinkosi.

¹¹ UDaniyeli wasesithi encekwini eyayimiswe induna yabathenwa ukuphatha uDaniyeli loHananiya loMishayeli loAzariya:

¹² Ake ulinge inceku zakho okwensuku ezilitshumi, usinike imibhida kuphela ukuba sidle yona sinathe lamanzi.

¹³ Ubusukhangela isimo sethu, lesimo samajaha adla ukudla kwenkosi okumnandi, wenzeke njengalokho okubonayo ezincekwini zakho.

¹⁴ Inceku yasilalela lokhu, yabalinga okwensuku ezilitshumi.

¹⁵ Ekupheleni kwensuku ezilitshumi babonakala bengcono bezimukile kulawo wonke amajaha ayesidla ukudla kwenkosi okumnandi.

¹⁶ Ngakhoke inceku yasisusa ukudla kwabo okumnandi kanye lewayini ababezakulinatha, yabanika imibhida kuphela.

¹⁷ Lamajaha amane uNkulunkulu wawanika ukwazi lamandla okufunda izincwadi, kanye lokuhlakanipha. Njalo uDaniyeli wayelokuqedisisa ngayo yonke imibono lamaphupho.

¹⁸ Ekupheleni kwesikhathi, lapho inkosi isitshilo ukuba lamajaha angeniswe esigodlweni, induna yabathenwa yawaletha phambi kukaNebukadineza.

¹⁹ Inkosi yakhuluma labo; phakathi kwawo wonke kwakungekho owayefana loDaniyeli loHananiya loMishayeli loAzariya; basebeqalisa ukuyisebenzela inkosi.

²⁰ Ezintweni zonke zokuhlakanipha lezokuqedisisa inkosi eyayibabuza ngazo, yabafumanisa besedlula ngokuphindwe katshumi zonke izanuse lezangoma ezazisembusweni wayo.

²¹ UDaniyeli waqhubeka kwaze kwaba ngumnyaka wokuqala wokubusa kwenkosi uKurosi.