uAmosi 9 - iBhayibhili Elingcwele 1978

Ukwahlulela kweNkosi

¹ Ngayibona iNkosi imi phansi kwealtare, yathi: Tshaya izihloko zezinsika ukuze iminyango inyikinyeke, uzaphulele amakhanda abo bonke abantu; abaseleyo ngizababulala ngempi; kakuyikuphunyuka loyedwa abaleke.

² Loba besehlela endaweni yabafileyo, isandla sami sizabakhupha khona; loba bakhwela besiya ezulwini, ngizabehlisa khona;

³ loba becatsha engqongeni yeKarmeli, ngizabadinga ngibehlise lalapho; loba becatsha enzikini yolwandle, ngizathumela umgobho ukuba ubalume;

⁴ loba bethunjwa yizitha zabo, lalapho ngizathumela impi ukuba ibabulale; ngizabehlisela okubi ngingabehliseli okuhle.

⁵ INkosi uNkulunkulu wamabandla yiyo ethinta umhlaba unyikinyeke, bakhale bonke abakhileyo kuwo, ukhukhumale wonke njengomfula iNile, ubuye ubohle njengeNile laseGibithe.

⁶ Yiyo eyakha izindlu zayo emazulwini, yamisa umkhathi wayo phezu komhlaba, ebiza amanzi olwandle, iwanisele phezu komhlaba; yiNkosi ibizo layo.

⁷ Kimi kalinjengamaEtiyopiya, lina bakoIsrayeli na? itsho iNkosi. Mina engakhupha uIsrayeli elizweni laseGibithe kangikhuphulanga amaFilistiya eKafitori lamaSiriya eKiri na?

⁸ Khangelani, mina Nkosi uNkulunkulu ngiwuqaphele umbuso owonayo; ngizawuchitha emhlabeni, kodwa kangiyikuyichitha yonke indlu kaJakobe, kutsho iNkosi.

⁹ Ngoba ngizakulaya ukuba uIsrayeli ahlungulwe phakathi kwazo zonke izizwe njengokuhlungulwa kwamabele ngokhomane, kodwa kakuyikuwela phansi lolulodwa uhlamvu.

¹⁰ Zonke izoni ebantwini bami zizabulawa empini, zona ezithi: Okubi kakuyikufinyelela kithi.

UIsrayeli uzakubuyiswa

¹¹ Ngalolosuku ngizakuvusa idumba likaDavida eliwileyo, ngivale izikhala zalo, ngilungise okudilikileyo kwalo, ngilakhe kutsha njengasensukwini zasendulo;

¹² ukuze badle ilifa lokuseleyo eEdoma, lasezizweni zonke ezibizwa ngebizo lami, kutsho iNkosi eyenza lokhu.

¹³ Khangelani, insuku ziyeza, kutsho iNkosi, lapho olimayo ezakuficana lovunayo, lokhama izithelo zevini aficane lohlanyela inhlanyelo; intaba zizathonta iwayini elimnandi, amaqaqa wonke ageleze iwayini.

¹⁴ Ngizabuyisa abantu bami uIsrayeli, bayakhe futhi imizi echithekileyo, bahlale kiyo; bahlanyele izivini, banathe iwayini lazo, balime amasimu, badle izithelo zawo.

¹⁵ Ngizakubagxumeka elizweni labo, bangabe besasitshulwa futhi elizweni engibanike lona, kutsho iNkosi uNkulunkulu wakho.