uAmosi 8 - iBhayibhili Elingcwele 1978

UAmosi utshengiswa izithelo zasehlobo

¹ INkosi yangitshengisa lokhu, ngabona isitsha sezithelo zasehlobo.

² Yathi kimi: Amosi, ubonani na? Ngathi: Ngibona isitsha sezithelo zasehlobo. INkosi yasisithi kimi: Ukuphela sekufikile ebantwini bami uIsrayeli; kangisayikubayekela futhi.

³ Izingoma zethempelini zizaphenduka zibe yikukhala mhlalokho, kutsho iNkosi uNkulunkulu; izidumbu zizagcwala indawo yonke, zikhutshelwe phandle. Thulanike!

Ukwahlulelwa kukaIsrayeli sekusondele

⁴ Zwanini lokhu, lina elinyathelela phansi abaswelayo, elichitha abayanga belizwe,

⁵ elithi: Ukuthwasa kwenyanga kuzadlula nini ukuze sithengise amabele? leSabatha lizaphela nini ukuze sidingise amabele ethu, senze isikali sokulinganisa sibe sincinyane, lemali ibe nengi, sikhohlise ngesilinganiso,

⁶ ukuze sithenge abayanga ngesiliva labaswelayo ngamanyathelo, sithengise amakhoba amabele na?

⁷ INkosi ifungile ngokuzigqaja kukaJakobe, yathi: Impela kangiyikuzikhohlwa izenzo zabo kuze kube nininini.

⁸ Kawuyikuqhaqhazela umhlaba wonke ngalokhu, balile bonke abakhileyo kiwo, ukhukhumale wonke njengomfula iNile, uphoseke le lale, ubuye ubohle njengeNile laseGibithe na?

⁹ Ngalolosuku, itsho iNkosi uNkulunkulu, ngizatshonisa ilanga emini, ngenze kube mnyama emhlabeni emini ekhanyayo.

¹⁰ Ngizaphendula imikhosi yenu ibe yikukhala, lengoma zenu zonke zibe yikulila, livunule izambatho zokulila, liphuce amakhanda enu, kube yisililo esinjengesokulilela indodana eyodwa, kube lusuku olubuhlungu impela.

¹¹ Khangelani, insuku ziyeza, kutsho iNkosi uNkulunkulu, lapho ngizathumela indlala elizweni, kungabi yindlala yokudla, kungabi ngeyokomela amanzi, kodwa kube ngeyokuzwa amazwi eNkosi.

¹² Abantu bazazula kusukela olwandle kuze kube solwandle, kusukela enyakatho kuze kube sempumalanga, bagijimele le lale, bedinga ilizwi leNkosi, bangalifumani.

¹³ Ngalolosuku intombi ezinhle lezinsizwa zizaqaleka ngenxa yokoma.

¹⁴ Abafunga isithombe saseSamariya besithi: Ukuphila kukankulunkulu wakho, Dani! lokuthi: Indlela yaseBerisheba; bazakuwa, bangabe besavuka.