uAmosi 7 - iBhayibhili Elingcwele 1978

UAmosi utshengiswa isikhongwane lomlilo lentambo yokumisa

¹ INkosi uNkulunkulu yangitshengisa lokhu; yenza isikhongwane ekuhlumeni kotshani bamuva, kwakungutshani bamuva emva kokusikwa kotshani benkosi.

² Kwathi lapho sesidlile utshani belizwe, ngathi: Nkosi Nkulunkulu, ake uthethelele, ngiyakuncenga. Uzaphepha kanjani uJakobe emncinyane kangaka?

³ INkosi yazisola ngalokhu, yathi: Lokhu kakuyikwenzeka.

⁴ INkosi uNkulunkulu yasingitshengisa lokhu; yehlisa umlilo ukwahlulela ngawo, owaqothula amanzi amanengi, owawusuzakuqeda ilizwe.

⁵ Ngasengisithi: Nkosi Nkulunkulu, ake ume, ngiyakuncenga. Uzaphepha kanjani uJakobe emncinyane kangaka?

⁶ INkosi yazisola ngalokhu, yathi: Lokhu lakho kakuyikwenzeka.

⁷ Yasingitshengisa lokhu; iNkosi yayimi ngasemdulini owakhiwa ngentambo yokumisa iphethe intambo yokumisa esandleni sayo.

⁸ Yathi kimi: Amosi, ubonani na? Ngathi: Ngibona intambo yokumisa. INkosi yasisithi: Khangela, ngiyabeka intambo yokumisa phakathi kwabantu bami uIsrayeli; kangisayikubayekela futhi;

⁹ indawo eziphakemeyo zokukhonzela zikaIsaka zizavalwa, lezindlu ezingcwele zakoIsrayeli zizadilizwa; ngizakuyivukela indlu kaJerobowamu ngomkhonto.

UAmaziya loAmosi

¹⁰ UAmaziya umpristi waseBetheli wasethumela ilizwi kuJerobowamu inkosi yakoIsrayeli, wathi: UAmosi ukuvusela abantu bakoIsrayeli, lelizwe kalilakuwamela wonke amazwi akhe.

¹¹ Ngoba uAmosi uthe: UJerobowamu uzabulawa yimpi, loIsrayeli athunjelwe elizweni elikhatshana.

¹² UAmaziya wasesithi kuAmosi: Wena mboni, hamba ubalekele elizweni lakoJuda, udle ukudla khona, utshumayele lapho,

¹³ ungatshumayeli futhi eBetheli, ngoba liyindlu yokukhonzela yenkosi lethempeli lombuso.

¹⁴ UAmosi wasemphendula uAmaziya esithi: Kangisuye umprofethi mina, futhi kangisindodana yomprofethi; kodwa ngingumalusi lomhlanyeli wezihlahla zephane.

¹⁵ INkosi yangithatha ekwaluseni, yathi kimi: Hamba uyetshumayela ebantwini bami uIsrayeli.

¹⁶ Ngakhoke zwana ilizwi leNkosi. Wena uthi: Ungatshumayeli ngoIsrayeli, ungakhulumi ngendlu kaIsaka.

¹⁷ INkosi yona ithi: Umkakho uzakuba liwule phakathi komuzi; amadodana lamadodakazi akho azabulawa yimpi, lelizwe lakini lizadatshulwa phakathi ngentambo; wenake uzakufela elizweni elingcolileyo, uIsrayeli athunjelwe elizweni elikhatshana.