uAmosi 6 - iBhayibhili Elingcwele 1978

Ukuchithwa kukaIsrayeli

¹ Maye kubo abachelesileyo eZiyone labalondolozekileyo entabeni yaseSamariya, amadoda adumileyo esizwe sokuqala abaya kuwo abakoIsrayeli!

² Dlulelani eKaline libone, lisuke lapho liye eHamathi elikhulu, beselisehlela eGathi lamaFilistiya. Bona bangcono kulalimibuso na? ilizwe labo likhulu kulelizwe lenu na?

³ Lina elibeka khatshana usuku olubi, lisondeze eduze isikhathi sobubi.

⁴ Maye kulabo abalala phezu kwemibheda eyenziwe ngophondo lwendlovu, bacambalale phezu kwemibheda yabo, badle inyama yamawundlu avela emhlambini, leyamankonyane avela esibayeni,

⁵ betshotsha izingoma ngechacho beziqambela izinto zokukhaliswa njengoDavida,

⁶ benatha iwayini ngezinkamba, bazigcobe ngamagcobo amahle, kodwa kabadabukeli ukuchitheka kukaJosefa.

⁷ Ngakhoke bazathunjwa kuqala, kuphele ukuxokozela kwabacambalalayo.

⁸ INkosi uNkulunkulu izifungile uqobo, yathi: Ngiyanengwa yikuzigqaja kukaJakobe, ngizonda inqaba zakhe; ngizawunikela umuzi lakho konke okukuwo.

⁹ Kuzakuthi uba kusele amadoda alitshumi endlininye azakufa.

¹⁰ Lapho isihlobo somunye wawo esitshisa amathambo akhe sithatha amathambo ukuba siwakhuphe endlini, sithi kophakathi endlini impela: Kusekhona omunye umuntu olawe na? Yena uzakuthi: Atshi. Thula, ungaliphathi ibizo leNkosi.

¹¹ Ngoba ngokulaya kweNkosi, indlu enkulu izakuba yizihlephu, lencinyane ibe yizicucu.

¹² Kambe amabhiza angagijima emadwaleni na? Kuyalinywa olwandle ngezinkabi na? Liphendulele okufaneleyo kwaba ngumuthi obulalayo, lezithelo zokulunga zaba yinto ebabayo.

¹³ Lina elithokoza ngeLodebari lithi: Kasizithumbelanga iKarnayimi ngamandla ethu na?

¹⁴ Ngoba khangelani, ngizalivusela isizwe, lina ndlu kaIsrayeli, kutsho iNkosi uNkulunkulu wamabandla; sizakulicindezela kusukela ekuyeni eHamathi kuze kube semfuleni waseAraba.