uAmosi 5 - iBhayibhili Elingcwele 1978

UIsrayeli utshelwa ukuba aphenduke

¹ Zwanini lelilizwi engilitsho ngani, libe yisililo, lina ndlu kaIsrayeli.

² Iwile intombi enguIsrayeli, kayisayikuvuka futhi; iwele phansi emhlabathini wayo, kakho ongayivusa.

³ INkosi uNkulunkulu ithi: Emzini okwaphuma kiwo abayinkulungwane kuzasala ikhulu nje, lokwaphuma kiwo abalikhulu kuzasala itshumi nje koIsrayeli.

⁴ Ngoba iNkosi ithi kuIsrayeli: Ngidingani ukuze liphile;

⁵ kodwa lingadingi iBetheli, lingangeni eGiligali, loba lidlulele eBerisheba, ngoba iGiligali lizathunjwa, leBetheli lizachitheka.

⁶ Dingani iNkosi ukuze liphile, funa ilumathe endlini kaJosefa njengomlilo otshisa uqothule, kungabi khona owucimayo eBetheli,

⁷ lina elihlanekela ukwahlulela likwenze kube yinto ebabayo, liphosele phansi ukulunga.

⁸ Yiyo eyenza inkanyezi ezithiwa yisiLimela lezithiwa yiziNja, lephendula umnyama omkhulu ube yikusa, iphendule imini ibe yibusuku, ibize amanzi olwandle iwanisele phezu komhlabathi; yiNkosi ibizo layo.

⁹ Yehlisela abalamandla ukuchitheka, lencithakalo phezu kwenqaba.

¹⁰ Liyamzonda obakhuzayo enkundleni abonayo, linengwe ngokhuluma iqiniso.

¹¹ Ngenxa yokuba linyathezela phansi abayanga, libize kibo isipho samabele, kaliyikuhlala kuzo izindlu zamatshe abaziweyo elizakhileyo; lihlanyela izivini ezinhle, kodwa kaliyikunatha iwayini lazo.

¹² Ngoba ngiyazi ukuba iziphambeko zenu zinengi kangakanani, lokuba izono zenu zinkulu kangakanani, lina elihlupha abalungileyo, lamukele umvuzo wokuthengwa, lixotshe abaswelayo enkundleni.

¹³ Ngakhoke ohlakaniphileyo uzakuzithulela ngalesosikhathi, ngoba kuyisikhathi esibi.

¹⁴ Dingani okuhle, atshi okubi, ukuba liphile, ukuze ibe lani iNkosi uNkulunkulu wamabandla njengokutsho kwenu.

¹⁵ Zondani okubi lithande okuhle, lenze okufaneleyo enkundleni; mhlawumbe iNkosi uNkulunkulu wamabandla ingaba lomusa kwabaseleyo koJosefa.

¹⁶ INkosi uNkulunkulu wamabandla ithi: Emidangeni yenu yonke kuzakuba khona ukulila, lakuzo zonke indlela bazakuthi: Maye! Maye! Bazabiza abalimi ukuba balile, labakwaziyo ukukhala ukuba balile.

¹⁷ Lakuzo zonke izivini kuzakuba khona ukulila, ngoba ngizadabula phakathi kwenu, kutsho iNkosi.

¹⁸ Maye kini, lina elifisa usuku lweNkosi! Usuku lweNkosi luzakulisizani na? Ngoba lungumnyama, kalusikho ukukhanya.

¹⁹ Kunjengomuntu obalekele isilwane, ehlangane lebhere, loba angene endlini abambelele ngesandla emdulini, alunywe yinyoka.

²⁰ Angithi usuku lweNkosi lungumnyama, kalusikho ukukhanya, usuku lomnyama ongelakukhanya, na?

²¹ Ngiyayizonda, ngiyayidelela imikhosi yenu, kangithokozi ngezinkonzo zenu.

²² Lanxa linikela kimi iminikelo yenu yokutshiswa kanye leyempuphu, kangiyikuyamukela, leminikelo yenu yokuthula eyezinkomo ezinonileyo kangiyikuyinanza.

²³ Susani kimi umsindo wezingoma zenu, kangiyikulalela lokukhala kwamachacho enu.

²⁴ Kodwa okufaneleyo kakugobhoze njengamanzi, lokulunga kugeleze njengemifula engacimiyo.

²⁵ Lina ndlu kaIsrayeli lake laletha kimi imihlatshelo leminikelo enkangala okweminyaka engamatshumi amane na?

²⁶ Lizakuthwala uSakuthi inkosi yenu loKayiwane inkanyezi kankulunkulu wenu, izithombe zenu elizenzele zona.

²⁷ Ngakhoke ngizakulenza ukuba lithunjelwe ngaphambi kweDamaseko, kutsho iNkosi, ebizwa ngokuthi nguNkulunkulu wamabandla.