uAmosi 3 - iBhayibhili Elingcwele 1978

Umsebenzi womprofethi

¹ Zwanini lelilizwi iNkosi elikhulume ngani, lina bakoIsrayeli, ngaso sonke isizwe eyasikhupha elizweni laseGibithe, ithi:

² Yini kuphela engilikhethileyo, ngalilondoloza ezizweni zonke zomhlaba; ngakhoke ngizalitshaya ngenxa yabo bonke ububi benu.

³ Ababili bangahamba bonke kanyekanye uba bengavumelananga na?

⁴ Isilwane singabhonga ehlathini singabambanga lutho na? sibhonge obhalwini lwaso singelalutho na?

⁵ Inyoni ingabanjwa lapho ingathiywanga khona na? lomjibila ungathanya uba ungabambanga lutho na?

⁶ Uphondo lungakhala emzini abantu bengethuki na? Umuzi ungehlelwa ngokubi iNkosi ingakuvumelanga na?

⁷ Impela iNkosi uNkulunkulu kayenzi lutho ingazambulelanga inceku zayo abaprofethi imfihlakalo yayo.

⁸ Isilwane sesibhongile, ngubani ongayikwesaba na? INkosi uNkulunkulu isikhulumile, ngubani ongayekela ukutshumayela na?

Ukwahlulelwa kweSamariya

⁹ Memezelani ezinqabeni zaseAsiriya lezinqabeni zaselizweni laseGibithe, lithi: Buthanani phezu kwezintaba zaseSamariya, libone iziphithiphithi ezinkulu eziphakathi kwalo lokucindezelwa okukilo.

¹⁰ Ngoba kabakwazi ukwenza okulungileyo, kutsho iNkosi, bagcwalisa inqaba zabo ngomvuzo wokugebenga lokuphanga.

¹¹ Ngakho iNkosi uNkulunkulu ithi: Izitha zizazingelezela ilizwe lakini, zichithe amandla enu, ziphangwe inqaba zenu.

¹² INkosi ithi: Njengalokho umalusi ekhupha emlonyeni wesilwane imilenze emibili loba isiqa sendlebe, ngokunjaloke abakoIsrayeli abahlala eSamariya bazakhutshwa, abalala emibhedeni elezingubo ezinhle.

¹³ Zwanini lifakaze ngendlu kaJakobe, kutsho iNkosi uNkulunkulu wamabandla; ithi:

¹⁴ Mhla ngitshaya uIsrayeli ngenxa yeziphambeko zakhe ngizatshaya ama‐altare aseBetheli, kwaphuke impondo zealtare ziwele phansi.

¹⁵ Ngizatshaya indlu yasebusika lendlu yasehlobo, izindlu zempondo zendlovu zizadilika, lezindlu ezinengi ziwohloke; kutsho iNkosi.