uAmosi 1 - iBhayibhili Elingcwele 1978

Ukwahlulelwa kwezizwe ezakhelene loIsrayeli

¹ La ngamazwi kaAmosi owayengomunye wabelusi baseTekowa, awaboniswa ngoIsrayeli ensukwini zikaUziya inkosi yakoJuda, lasensukwini zikaJerobowamu indodana kaJowashi inkosi yakoIsrayeli iminyaka emibili ngaphambi kokuzamazama komhlaba.

² Wathi: INkosi iyaduma iseZiyone, izwakalise ilizwi layo iseJerusalema; amadlelo abelusi atshe, lezingqonga zeKarmeli zibune.

³ INkosi ithi: Ngenxa yeziphambeko ezinengi zabaseDamaseko kangiyikubayekela, ngoba babhula iGileyadi ngembulo zensimbi.

⁴ Ngakho ngizathumela umlilo endlini kaHazayeli ozakuqeda izinqaba zikaBenihadadi.

⁵ Ngizakwaphula imigoqo yamasango aseDamaseko, ngibaqede abakhileyo esihotsheni saseAveni, kanye laye obusayo eBeti‐Edeni, labantu baseSiriya bazathunjelwa eKiri; kutsho iNkosi.

⁶ INkosi ithi: Ngenxa yeziphambeko ezinengi zabaseGaza kangiyikubayekela, ngoba bathumba isizwe sonke ukuba basinikele kuEdoma.

⁷ Ngakho ngizathumela umlilo phezu kwemithangala yaseGaza ozakutshisa izinqaba zalo.

⁸ Ngizakuqeda abakhileyo eAshidodi, kanye laye obusayo eAshikeloni, ngiphendukele eEkroni; labaseleyo bamaFilistiya bazabhubha; kutsho iNkosi uNkulunkulu.

⁹ INkosi ithi: Ngenxa yeziphambeko ezinengi zabaseTire kangiyikubayekela, ngoba banikela isizwe sonke kuEdoma, kabaze bakhumbula isivumelwano sobuzalwane.

¹⁰ Ngakho ngizathumela umlilo phezu kwemithangala yaseTire ozakuqeda izinqaba zalo.

¹¹ INkosi ithi: Ngenxa yeziphambeko ezinengi zamaEdoma kangiyikuwayekela, ngoba axotshana labafowabo ngomkhonto, aswela isihawu, lolaka lwawo lwavutha njalonjalo, ahlala ethukuthela kokuphela.

¹² Ngakho ngizathumela umlilo phezu kweTemani ozakuqeda izinqaba zaseBozira.

¹³ INkosi ithi: Ngenxa yeziphambeko ezinengi zamaAmoni kangiyikuwayekela, ngoba aqhaqha abesifazana abakhulelwayo eGileyadi, ukuba andise ilizwe labo.

¹⁴ Ngakho ngizaphemba umlilo emithangaleni yaseRaba ozakuqeda izinqaba zalo ngokumemeza osukwini lokulwa, langesiphepha osukwini lwesivunguzane;

¹⁵ lenkosi yabo izathunjwa, yona kanye lezikhulu zayo; kutsho iNkosi.