Izililo 1 - iBhayibhili Elingcwele 1978

Usizi lweJerusalema elichithekileyo

¹ Yeka ukuhlala kwawo wodwa umuzi owawugcwele abantu! Usunjengomfelwakazi wona owawumkhulu phakathi kwezizwe. Wona owawuyinkosikazi phakathi komuzi usungobuswayo.

² Uyakhala kakhulu ebusuku, inyembezi zawo zehla ezihlathini zawo. Phakathi kwazo zonke izithandwa zawo kakho owududuzayo. Bonke abangane bawo bawuphethe ngenkohliso, sebeyizitha zawo.

³ UJuda wathunjwa waya kwezinye izizwe ngenxa yokuhlupheka lobugqili obukhulu. Usehlezi phakathi kwezizwe, kafumani ukuphumula. Bonke abamzingelayo bamficile ephakathi kobuhlungu.

⁴ Imigwaqo eya eZiyone iyalila, ngoba kakho ozayo kulo emikhosini emisiweyo. Emasangweni alo kakulabantu, labapristi balo bayabubula. Intombi zalo ziyahlupheka. Liyahlupheka kakhulu.

⁵ Izitha zalo sezilibusa, ziyaphumelela, ngoba iNkosi ilenze lahlupheka ngenxa yobunengi beziphambeko zalo. Abantwana balo bathunjiwe yizitha.

⁶ Bonke ubukhosi buphelile eZiyone. Izikhulu zalo sezinjengezimpala ezingafumani idlelo, zibalekile zingelamandla phambi kwabazixotshayo.

⁷ IJerusalema liyakhumbula ensukwini zokuhlupheka lezosizi lwalo konke okuhle okwakukhona ensukwini zasendulo. Nxa abantu balo bewela ezandleni zesitha, kwakungekho olisizayo; isitha sathokoza ngalo, sahleka ukuchitheka kwalo.

⁸ IJerusalema lonile kakhulu, ngakho seliyisinengiso. Bonke ababelihlonipha sebelidelela, ngoba sebebonile ubuze balo. Yebo, selibubula, likhangele eceleni.

⁹ Ukungcola kwalo kwakusezidwabeni zalo, kalikhumbulanga ngokuchitheka kwalo. Ngakhoke ukuwa kwalo kukhulu, kalilaye umduduzi. Nkosi, akukhangele ukuhlupheka kwalo, ngoba isitha sesinqobile.

¹⁰ Isitha selula izandla zaso ukuthatha konke okuhle kwalo. Libonile izizwe zihlasela indlu yalo engcwele, zona owazalela ukungena phakathi kwebandla lakho.

¹¹ Bonke abantu balo bayabubula bedinga ukudla; banike okuligugu kwalo ngokudla ukuba baqinise amandla abo. Nkosi, ake ukhangele ngoba mina Jerusalema ngiyadelelwa.

¹² Kakusilutho kini yini lonke elidlulayo na? Khangelani libone ukuba kukhona yini usizi olunjengolwami, olwehliselwe phezu kwami, iNkosi engehlisele lona osukwini lokuthukuthela kwayo.

¹³ Iphezulu ithumele umlilo, yawehlisela emathanjeni ami. Yathiya inyawo zami ngembule, yangibuyisela emuva. Yangitshiya ngithithibele, ngiphele amandla usuku lonke.

¹⁴ Iziphambeko zami zabotshelwa kimi, isandla sayo sazithandela kimi. Ijogwe layo lafakwa entanyeni yami, ngaphela amandla ngenxa yobunzima balo. INkosi yangiyekelela kilo, ngahluleka ukuma.

¹⁵ INkosi yeyisile wonke amaqhawe ami phakathi kwami, yaletha impi ukubulala insizwa zami. INkosi inyathele uJuda njengasesikhamelweni sewayini.

¹⁶ Ngiyakhala ngenxa yalokho, amehlo ami ajuluka inyembezi; ngoba umduduzi ukhatshana lami obezakungimisa isibindi. Abantwana bami bachithekile ngoba isitha sinqobile.

¹⁷ IZiyone liyelula izandla zalo ukukhuleka, kodwa kakho oliduduzayo. INkosi ilayile ngoJakobe ukuthi abakhelene laye babe yizitha zakhe. IJerusalema seliyisinengiso phakathi kwabo.

¹⁸ INkosi ilungile, ngoba ngilihlamukile ilizwi layo. Kodwa ake lizwe, bantu lonke, libone ukuhlupheka kwami. Intombi zami lensizwa zami zithunjiwe.

¹⁹ Ngabiza izithandwa zami, kodwa zangikhohlisa. Abapristi labadala bami bafela phakathi komuzi, besadinga ukudla ukuba baqinise amandla abo.

²⁰ Ake ukhangele, Nkosi, ngoba sengihluphekile, imibilini yami idungekile, inhliziyo yami ikhathazekile phakathi kwami, ngoba ngihlamukile kakhulu. Phandle ngumkhonto obulalayo, endlini yikufa.

²¹ Ake uzwe ukububula kwami, kakho ongiduduzayo. Zonke izitha zami zizwile ngokuhlupheka kwami, ziyathokoziswa yikuthi nguwe okwenzileyo. Lufikise usuku osulumemezile, uzenze ukuba zibe njengami.

²² Kakufike bonke ububi bazo phambi kwakho, wenze kizo njengokwenza kwakho kimi ngenxa yazo zonke iziphambeko zami. Ngoba ukububula kwami kukhulu, lenhliziyo yami ikhathele.