Izaga 8 - iBhayibhili Elingcwele 1978

Ukudunyiswa kokuHlakanipha

¹ Lalelani! UkuHlakanipha kuyamemeza, lokuQedisisa kuyezwakalisa ilizwi lakho.

² Kumi emaqaqeni, langasendleleni, lasekuhlanganeni kwezindlela.

³ Kuyamemeza ngasemasangweni omuzi, ngasentubeni zakhona, kuthi:

⁴ Ngiyalibiza, lina madoda, ngimemeza kubo bonke abantu.

⁵ Lina elingelalwazi, fundani ukuhlakanipha; lani zithutha, lifunde ukuqedisisa.

⁶ Zwanini, ngoba ngizakhuluma izinto ezinhle, emlonyeni wami kuzaphuma okulungileyo;

⁷ ngoba umlomo wami ulandisa iqiniso, amanga ayisinengiso endebeni zami.

⁸ Wonke amazwi ami alungile, kalikho lelilodwa elitshilekileyo lelingaqondanga.

⁹ Wonke aqondile kulowo oqedisisayo, alungile kulowo olokwazi.

¹⁰ Yamukelani ukufundisa kwami endaweni yesiliva, lokwazi endaweni yegolide elihle;

¹¹ ngoba ukuhlakanipha kungcono kulamatshe amahle, lakho konke okufisekayo kakulakulinganiswa lakho.

¹² Mina ngiyikuHlakanipha, ngilokuqedisisa, ngingafumana ukwazi lengqondo ehlakaniphileyo.

¹³ — Ukwesaba iNkosi kuyikuzonda ububi — Ngiyakuzonda ukuzigqaja lokuziqakisa, lezindlela ezimbi, lokukhuluma okukhohlisayo.

¹⁴ Ngilokweluleka lokuhlakanipha okuqondileyo, ngilokuqedisisa lamandla.

¹⁵ Ngami amakhosi ayabusa, lababusi benza imithetho emihle.

¹⁶ Ngami izikhulu ziyabusa, leziphathamandla ziyahlulela umhlaba.

¹⁷ Ngiyathanda labo abangithandayo, lalabo abangidingisisayo bayangifumana.

¹⁸ Kimi kukhona inotho lodumo, inotho engelakuphela lempumelelo.

¹⁹ Izithelo zami zingcono kulegolide elihle, lesivuno sami singcono kulesiliva esihle.

²⁰ Ngihamba endleleni yokulunga, lasemikhondweni yokwahlulela;

²¹ nginothisa labo abangithandayo, ngigcwalise izindlu zabo ngenotho.

²² INkosi yangidala ngaba ngiyikuqala komsebenzi wayo, ngaphambi kwakho konke eyakwenzayo endulo.

²³ Ngamiswa kudala, ekuqaleni kwesikhathi, umhlaba ungakabi khona.

²⁴ Kungakabi khona ulwandle ngasengizelwe, yebo, ingakabi khona imithombo egcwele amanzi.

²⁵ Intaba zingakamiswa endaweni zazo, kungakabi khona lamaqaqa, ngasengizelwe,

²⁶ iNkosi ingakawenzi umhlaba leganga, lenhlabathi yokuqala.

²⁷ Lapho imisa iphezulu ngangikhona, lalapho ibeka umkhathi ngaphezu kolwandle,

²⁸ lapho isenza amayezi amanengi phezulu, lemithombo yamanzi endaweni zayo,

²⁹ lapho imisela ulwandle imikhawulo yalo, ukuze amanzi angeqi ilizwi layo, lalapho isenza izisekelo zomhlaba,

³⁰ ngangilayo ngiyingcitshi yomsebenzi, ngiyithabisa insuku ngensuku, ngidlala njalo phambi kwayo,

³¹ ngidlala emhlabeni wayo, ngithokoza ngabantu.

³² Bantwana bami, ngilalelani; babusisiwe abagcina indlela zami.

³³ Zwanini ukulaya, lihlakaniphe, lingali.

³⁴ Ubusisiwe umuntu ongizwayo, alinde insuku ngensuku ngasemasangweni ami, akhangele iminyango yami.

³⁵ Ngoba ofumanayo mina, ufumana lokuphila, azuze umusa eNkosini,

³⁶ kodwa ongangifumaniyo uyazilimaza; bonke abangizondayo bathanda ukufa.