Izaga 7 - iBhayibhili Elingcwele 1978

Ubuqili bowesifazana omubi

¹ Mntanami, gcina amazwi ami, uzibekele imilayo yami.

² Gcina imilayo yami, uphile, ukulondoloze ukufundisa kwami kube ligugu kuwe,

³ ukufake eminweni yakho, uyigwale enhliziyweni yakho.

⁴ Biza ukuHlakanipha ngokuthi ngudadewenu; ubize ukuQedisisa ngokuthi ngumngane wakho;

⁵ ukuze kukugcine kumfazi oyisifebe, kowesifazana omubi olamazwi akhohlisayo.

⁶ Ngema ewindini lendlu yami, ngalunguza ngaphandle,

⁷ ngabona amajaha angelalwazi, omunye wawo owayeyisithutha

⁸ ezidlulela ejikweni lendlela, eqonda emzini wesifebe,

⁹ kusihlwa sekumnyama.

¹⁰ Wasehlangatshezwa ngowesifazana, egqoke njengewule, elobuqili,

¹¹ eziqakisa engathembekanga, engathandi ukuhlala emzini wakhe,

¹² kuqala usendleleni, abesesiya emdangeni, ecathama emajikweni wonke.

¹³ Wamdumela, wamanga, waziqakisa wathi kuye:

¹⁴ Bekumele nginikele imihlatshelo, lamhla sengigcwalisile izifungo zami;

¹⁵ ngakho ngiphumile ukukuhlangabeza, ngifudinge ngikufice.

¹⁶ Ngendlele ingubo embhedeni wami, lamalembu amahle alemibala avela eGibithe;

¹⁷ ngifafazile umbheda wami, ngemure langamakha enhlaba langekinamoni.

¹⁸ Woza, sizijabulise ngothando kuze kuse, sizithokozise ngothando.

¹⁹ Ngoba indoda yami kayikho, ihambile uhambo olude,

²⁰ yahamba lemali enengi, izakubuya nxa inyanga isidilingene.

²¹ Wamyenga ngamazwi amahle, wamhuga ngamazwi amnandi.

²² Ijaha laselimlandela njengenkabi isiya ekuhlatshweni, njengempunzi ebanjwe ngumjibila,

²³ ize ihlatshwe ngomtshoko enhliziyweni yayo, njengenyoni ithothela esifwini, ingazi ukuthi izalahlekelwa yikuphila.

²⁴ Khathesi, bantwana bami, ngizwani, lilalele amazwi ami.

²⁵ Lingavumeli inhliziyo zenu ziphambukele endleleni zakhe, lingahambi emikhondweni yakhe;

²⁶ ngoba labo abawisele phansi banengi, yebo, labo ababulalayo balixuku elikhulu elingelakubalwa.

²⁷ Indlu yakhe iyindlela eya endaweni yabafileyo, eyehlela ezindlini zokufa.