Izaga 6 - iBhayibhili Elingcwele 1978

Izixwayiso ezimayelana lezibambiso lobuvila lokwenza okubi

¹ Mntanami, uba uyisibambiso somakhelwana wakho, uba uzinikele ukuba ube yisibambiso kowezizwe,

² usuthiyiwe yisithembiso sakho, ubanjiwe ngamazwi akho,

³ yenza lokhu, mntanami, uzophule, lokhu ususesandleni somakhelwana wakho; phangisa uhambe, uyemncenga umakhelwana wakho,

⁴ ungaphumuli, ungalali ubuthongo;

⁵ uzophule njengomziki emjibileni, njengenyoni esandleni somthiyi.

⁶ Yana ebunyonyweni, wena vila, ubone indlela zabo, uhlakaniphe.

⁷ Kabulankosi lenduna lombusi,

⁸ kanti bubutha ukudla kwabo ehlobo, buvune ngesikhathi sokuvuna.

⁹ Wena vila, koze kube nini ulele na? Uzakuvuka nini?

¹⁰ Uzalala ubuthongo obuncinyane, uwozele kancinyane, usonge izandla ukuba uphumule okwesikhatshana,

¹¹ ubususehlelwa yibuyanga njengomphangi lokuswela njengesikliwi.

¹² Umuntu omubi, umuntu ongalunganga, yilowo onyeyayo akhuluma okubi,

¹³ afice amehlo, atshudule ngenyawo zakhe, akhombe ngomunwe;

¹⁴ ngenhliziyo embi uyaceba okubi, ubanga ingxabano sonke isikhathi.

¹⁵ Ngakho uzakwehlelwa yinhlupheko masinyane, alimale ngomzuzu nje, angabi lakusiliswa.

¹⁶ Kukhona izinto ezithile ezizondwa yiNkosi, yebo, izinto eziyisikhombisa eziyizinengiso kuyo;

¹⁷ ukukhangela ngokuzigqaja, lolimi oluqamba amanga, lezandla ezichitha igazi lomuntu ongelacala,

¹⁸ lenhliziyo eceba amacebo amabi, lenyawo ezikhawuleza ukwenza okubi,

¹⁹ lofakazi omubi oqamba amanga, lomuntu obanga ingxabano phakathi kwabazalwane.

Isixwayiso esimayelana lobufebe

²⁰ Mntanami, gcina imilayo kayihlo, ungakwali ukufundisa kukanyoko;

²¹ kugcine enhliziyweni yakho njalo, kubophele entanyeni yakho.

²² Ekuhambeni kwakho kuzakukuhola, ekulaleni kwakho kukulondoloze, lasekuvukeni kwakho kukhulume lawe.

²³ Ngoba umlayo uyisibane, lokufundisa kuyikukhanya, lokukhuza lokulaya kuyindlela yokuphila,

²⁴ ukuze ugcineke ungayi emfazini womunye umuntu, lasemazwini akhohlisayo lowesifazana omubi.

²⁵ Ungakhanuki ubuhle bakhe enhliziyweni yakho, angakuyengi ngamehlo akhe amahle;

²⁶ ngoba isiphingi singathengwa ngesinkwa esisodwa nje, kodwa umfazi womuntu ufuna impilo yomuntu uqobo.

²⁷ Kambe umuntu angathwala umlilo ngesifuba sakhe, izigqoko zakhe zingatshi na?

²⁸ Umuntu angahamba phezu kwamalahle avuthayo, inyawo zakhe zingatshi na?

²⁹ Unjalo yena olala lomkamakhelwana wakhe; bonke abathinta umfazi onje kabayikuyekelwa.

³⁰ Abantu kabalideleli yini isela nxa liseba ukuba lidle lisuthe, lanxa lilambile na?

³¹ Uba libanjiwe, kufanele ukuba lihlawule kuphindwe kasikhombisa, linikele yonke impahla yendlu yalo.

³² Kodwa ofebayo uyisithutha; owenza lokhu nguye ozibhubhisayo;

³³ uzatshaywa, agconwe, lehlazo lakhe kalisoze liphele.

³⁴ Ngoba ubukhwele bomuntu bungavusa ulaka lwakhe, kayikuba lasihawu ngosuku lokuphindisela kwakhe;

³⁵ kayikuvuma ukuhlawulwa, kayikuthuliswa lanxa umupha izipho ezinengi.