Izaga 5 - iBhayibhili Elingcwele 1978

Isixwayiso esimayelana lobufebe

¹ Mntanami, lalela ukuhlakanipha kwami, uzwe ukufundisa kwami,

² ukuba ube lengqondo ehlakaniphileyo, lomlomo wakho ukhulume ngokwazi.

³ Ngoba ulimi lwesifebe lumnandi njengoluju, lamazwi aso abutshelezi kulamagcobo;

⁴ kodwa ekucineni siyababa njengomhlonyane, sibukhali njengensingo.

⁵ Inyawo zaso zehlela ekufeni, lezinyathelo zaso zihamba ngendlela yasendaweni yabafileyo.

⁶ Kasinanzeleli indlela yokuphila; indlela zaso ziyazulazula, kodwa kasikunanzi.

⁷ Ngalokho, mntanami, ungilalele, ungaphambuki emazwini ami.

⁸ Ube khatshana laso, ungasondeli emnyango wendlu yaso,

⁹ funa unikele udumo lwakho kwabanye, lobudala bakho kwabangelasihawu,

¹⁰ labezizwe bazitike ngenotho yakho, lenzuzo zokusebenza kwakho zinikelwe kowezizweni,

¹¹ kuze kuthi ekupheleni kokuphila kwakho, lapho usucakile, ububule,

¹² uthi: Ngazondelani ukulaywa? Ngadelelelani ukukhuzwa na?

¹³ Kangizwanga ilizwi labafundisi bami, kangibalalelanga abangifundisayo.

¹⁴ Ngaphosa ngaba lehlazo elikhulu emhlanganweni.

¹⁵ Natha amanzi kowakho umgodi, amanzi agobhozayo emthonjeni wakho.

¹⁶ Ungavumeli ukuba imithombo yakho ichithele egangeni, lezifula zakho zigelezele endleleni zabantu;

¹⁷ kayibe ngeyakho wena wedwa, ingabi ngeyabafokazi kanye lawe.

¹⁸ Yena ongumthombo wakho, umfazi wobutsha bakho, kabusiswe; thokoza ngaye,

¹⁹ oyimpala enhle lembabala ebukekayo; amabele akhe kawakuthokozise insuku zonke, ubanjwe luthando lwakhe kokuphela.

²⁰ Ubanjelwani, mntanami, luthando lwesifebe, ugone owesifazana omubi na?

²¹ Ngoba indlela zomuntu ziphambi kweNkosi, iyaqaphelisa zonke indlela zakhe.

²² Omubi uyathiywa ngezakhe izenzo ezimbi, abanjwe yizono zakhe.

²³ Uzabhubha ngokuswela ukulaywa, aqedwe yibubi bakhe obukhulu.