Izaga 4 - iBhayibhili Elingcwele 1978

Ukuhlakanipha kuletha inzuzo ethile

¹ Bantwana bami, zwanini ukufundisa kukayihlo, lilalele ukuba lizuze ukuqedisisa;

² ngoba ngiyalinika izifundiso ezinhle; lingakutshiyi ukufundisa kwami.

³ Lapho ngangingumntwana kababa, ngingumntwanyana oyedwa kamama,

⁴ wangifundisa wathi kimi: Bambelela emazwini ami ngenhliziyo yakho, ugcine imilayo yami, uphile;

⁵ ungawakhohlwa amazwi ami, futhi ungawafulatheli. Zuza ukuhlakanipha, ube lokuqedisisa.

⁶ Ungakulahli ukuhlakanipha, kuzakukulondoloza; ukuthande, kuzakukulinda.

⁷ Ukuhlakanipha kudlula konke; zuza ukuhlakanipha; uzuze ukuqedisisa ngakho konke olakho;

⁸ ukuthande kakhulu, kuzakukuphakamisa, ukugone, kuzakukulethela udumo.

⁹ Kuzakwethwesa umqhele omuhle ekhanda lakho, kukuthwalise umqhele wodumo.

¹⁰ Zwana, mntanami, wamukele amazwi ami, ukuba uphile iminyaka eminengi.

¹¹ Ngikufundisile indlela yokuhlakanipha, ngikuholile endleleni zobuqotho.

¹² Ekuhambeni kwakho kawuzukutshelela, ekugijimeni kwakho kawuyikukhubeka.

¹³ Bambelela kulokho okufundileyo, ungakuyekeli ukuba kuphunyuke, ukugcine kuhle, ngoba kuyikuphila kwakho.

¹⁴ Ungangeni emkhondweni wababi, ungahambi endleleni yabonayo.

¹⁵ Ixwaye, ungahambi ngayo, uyinqwethe, udlulele phambili.

¹⁶ Ngoba kabalali uba bengenzanga okubi, baswela ubuthongo uba bengakhubekisanga muntu.

¹⁷ Ububi buyikudla kwabo, lesihluku siliwayini labo.

¹⁸ Indlela yabalungileyo injengovivi lokusa oluqhubeka ngokukhanya njalo kuze kube semini;

¹⁹ kodwa indlela yababi injengomnyama omkhulu, kabazi ukuthi kuyini okubakhubekisayo.

²⁰ Mntanami, zwana lokho engikukhulumayo, ulalele amazwi ami.

²¹ Kawangaphunyuki phambi kwakho, uwagcine enhliziyweni yakho;

²² ngoba ayikuphila kuye owafumanayo, lempilo yomzimba wakhe wonke.

²³ Phezu kwakho konke gcina inhliziyo yakho, ngoba kuvela kiyo ukuphila.

²⁴ Nqanda umlomo wakho emazwini amabi, lendebe zakho ekukhulumeni okukhohlisayo.

²⁵ Amehlo akho kawakhangele phambili, ujolozele okuphambi kwakho.

²⁶ Qaphelisa indlela ehanjwa zinyawo zakho, ukuba konke ukuhamba kwakho kuqine.

²⁷ Ungaphambukeli kokubi, unganyatheli lapho kukhona okubi.