Izaga 3 - iBhayibhili Elingcwele 1978

Ezinye izeluleko kumajaha

¹ Mntanami, ungakhohlwa ukufundisa kwami, kodwa uyigcine imilayo yami enhliziyweni yakho;

² ngoba izakukulethela insuku ezinengi zokuphila, leminyaka eminengi kanye lempumelelo.

³ Umusa lokuthembeka kakungakutshiyi, kodwa kubophele entanyeni yakho, ukugwale enhliziyweni yakho.

⁴ Ngalokho uzakuthandeka, uhlonitshwe, phambi kukaNkulunkulu laphambi kwabantu.

⁵ Themba eNkosini ngayo yonke inhliziyo yakho, ungathembi kokwakho ukuqedisisa.

⁶ Ivume endleleni zakho zonke, uzaqondisa imikhondo yakho yonke.

⁷ Ungacabangi ukuthi uhlakaniphile, kodwa yesabe iNkosi, utshiye ububi.

⁸ Lokho kuzakukunika impilo kube njengomuthi wokukwelapha.

⁹ Dumisa iNkosi ngemfuyo yakho, langezithelo zakho zokuqala zonke;

¹⁰ ng’khona iziphala zakho zizagcwala amabele, lezikhamelo zakho ziphuphume iwayini.

¹¹ Mntanami, ungadeleli ukulaya kweNkosi, ungathukutheli ngokukhuza kwayo;

¹² ngoba iNkosi iyamlaya emthandayo, njengoyise elaya indodana yakhe ayithandayo.

¹³ Ubusisiwe umuntu ofumana ukuhlakanipha, lozuza ukuqedisisa;

¹⁴ ngoba ukuhlakanipha kuyaveza okunengi kulesiliva, lenzuzo enkulu kulegolide.

¹⁵ Kuligugu elidlula amatshe amahle, lakho konke ongakufisa kakulakulinganiswa lakho.

¹⁶ Kukhona ukuphila okude esandleni sakho sokunene, lenotho lodumo esandleni sakho sokhohlo.

¹⁷ Indlela zakho ziyathokozisa, lemikhondo yakho iyaphumelelisa.

¹⁸ Kuyisihlahla esiletha ukuphila kwabakubambayo, lalabo ababambelela kukho babusisiwe.

¹⁹ INkosi yasekela umhlaba ngokuhlakanipha, yamisa iphezulu ngokuqedisisa,

²⁰ kwagobhoza amanzi ngokwazi kwayo, lamayezi anisa amazolo.

²¹ Mntanami, gcina amandla lengqondo ehlakaniphileyo, kakungaphunyuki phambi kwakho;

²² kuzakuba yikuphila komphefumulo wakho, lomgaxo omuhle entanyeni yakho.

²³ Ng’khona uzahamba uvikelekile, lenyawo zakho zingakhubeki.

²⁴ Nxa uhlala phansi, kawuyikwesaba, lapho ulala, uzakuba lobuthongo obumnandi.

²⁵ Ungethuki nxa ukuchitheka kukujuma, njengesiphepha sifikela ababi;

²⁶ ngoba iNkosi izakuba lithemba lakho, igcine unyawo lwakho ukuba lungabanjwa ngumjibila.

²⁷ Ungali ukusiza abantu abakucelayo, nxa ulamandla ukukwenza.

²⁸ Ungatsho kumakhelwana wakho ukuthi: Buya kusasa, ngizakukunika khona; lapho ulakho.

²⁹ Ungacebi okubi ngomakhelwana wakho ohlala lawe engesabi lutho.

³⁰ Ungaphikisani lomuntu kungelasizatho, ongakonanga ngalutho.

³¹ Ungamhawukeli umuntu omubi, ungalandeli leyodwa yezindlela zakhe;

³² ngoba umuntu ongaqondanga uyazondwa yiNkosi, kodwa abaqotho iyabathemba,

³³ Isiqalekiso seNkosi sisendlini yababi, kodwa iyawubusisa umuzi wabalungileyo.

³⁴ Abeyisayo iyabeyisa, kodwa abazithobileyo iyabapha umusa.

³⁵ Abahlakaniphileyo bazakuzuza udumo, kodwa abayizithutha bazazuza ihlazo.