Izaga 21 - iBhayibhili Elingcwele 1978

¹ INkosi iphatha inhliziyo yombusi, imqondisa njengokuthanda kwayo njengokuqondisa kwayo imifula yamanzi.

² Zonke indlela zomuntu zilungile kuye, kodwa iNkosi ihlola inhliziyo.

³ Ukwenza ukulunga lokufaneleyo kuyithokozisa iNkosi kakhulu kulemihlatshelo.

⁴ Ukuzikhukhumeza lokuzigqaja kuyizono ezibusa ababi.

⁵ Ukulungiselela kwabakhutheleyo kuveza okunengi, bonke abalamawala bazakuswela.

⁶ Inotho ezuzwa ngokuqamba amanga injengomoya odlulayo, futhi ingumjibila wokufa.

⁷ Isihluku sababi sizabakhukhula, ngoba besala ukwenza okulungileyo.

⁸ Abalamacala bahamba ngendlela engaqondanga, abamsulwa benza okulungileyo.

⁹ Kungcono ukuhlala ophahleni kulokuhlala endlini lowesifazana ohluphayo.

¹⁰ Omubi ufisa ukwenza okubi, kalasihawu kumakhelwana wakhe.

¹¹ Nxa isideleli sitshaywa, umuntu ongelalwazi uyahlakanipha; kodwa ohlakaniphileyo uyafunda nxa elaywa.

¹² UNkulunkulu olungileyo uyaqaphelisa indlu yomubi, amchithe omubi.

¹³ Ovala indlebe zakhe ekukhaleni kwabayanga laye kayikusatshelwa ekukhaleni kwakhe.

¹⁴ Isiphiwo esinikwa ensitha sidambisa intukuthelo, lomvuzo wokuthengwa onikwa ensitha udambisa ulaka oluvuthayo.

¹⁵ Lapho ukulunga kusenziwa, abalungileyo bayathokoza, kodwa ababi bayachitheka.

¹⁶ Umuntu oduha endleleni yokuhlakanipha uzahlala endaweni yabafileyo.

¹⁷ Othanda ukuzithokozisa uzakuba ngumyanga, lothanda iwayini lezibondlo kayikunotha.

¹⁸ Abantu ababi bazehlisela ububi abazama ukubehlisela kwabalungileyo.

¹⁹ Kungcono ukuhlala enkangala kulokuhlala lowesifazana ohluphayo lothethayo.

²⁰ Indlu yohlakaniphileyo igcwele inotho, kodwa oyisithutha uyayichitha inotho yakhe.

²¹ Odinga ukulunga lomusa uzakuthola ukuphila lodumo.

²² Ohlakaniphileyo anganqoba umuzi wamaqhawe, adilizele phansi inqaba ayithembileyo.

²³ Onqanda umlomo wakhe lolimi lwakhe uyazivikela enhluphekweni.

²⁴ Umuntu ozigqajayo, lozikhukhumezayo, lohamba ngokuziqakisa, kuthiwa uyisideleli.

²⁵ Izifiso zevila ziyalibhubhisa ngoba kalithandi ukusebenza;

²⁶ usuku lonke liyafisa izinto; kodwa olungileyo uyaphana, kancitshani.

²⁷ Umhlatshelo wababi uyisinengiso eNkosini, ikakhulu nxa bewuletha ngenhliziyo ezimbi.

²⁸ Ufakazi wamanga uzakubhubha, kodwa ilizwi lolalelayo lizalalelwa.

²⁹ Omubi uzitshaya olesibindi, kodwa olungileyo uqinile ekuhambeni kwakhe.

³⁰ Ukuhlakanipha lokuqedisisa lokweluleka kakusilutho phambi kweNkosi.

³¹ Ibhiza lingalungiselwa usuku lokulwa, kodwa yiNkosi enika ukunqoba.