Izaga 2 - iBhayibhili Elingcwele 1978

Umvuzo wokuhlakanipha

¹ Mntanami, uba usamukela amazwi ami, ugcine imilayo yami enhliziyweni yakho,

² ulalele ukuhlakanipha, ubeke ingqondo yakho ekuqedisiseni,

³ yebo, uba ubiza ukuzwisisa, ememeze ukuqedisisa,

⁴ uba ukudinga njengesiliva, ukuphenye njengempahla eligugu efihliweyo,

⁵ ng’khona uzakwazi ukuyesaba iNkosi, ufumane ukumazi uNkulunkulu.

⁶ Ngoba yiyo enika ukuhlakanipha, efundisa ukwazi lokuqedisisa.

⁷ Iyagcinela abaqotho amandla, iyisihlangu kubo abahamba ngeqiniso;

⁸ iyalinda indlela zokulunga, ilondoloze ukuhamba kwabathembekileyo bayo.

⁹ Ng’khona uzakwazi okufaneleyo lokulungileyo, lokuqonda, lendlela zonke ezilungileyo;

¹⁰ ngoba ukuhlakanipha kuzangena engqondweni yakho, lokwazi kube mnandi enhliziyweni yakho.

¹¹ Ingqondo ehlakaniphileyo izakukugcina, lokuqedisisa kukulondoloze,

¹² kukukhulule endleleni ezimbi, lasebantwini abakhuluma amazwi akhohlisayo,

¹³ abatshiya indlela yobuqotho, ukuba bahambe ngendlela zomnyama,

¹⁴ bethokoza ngokwenza okubi, bejabula ngezenzo ezikhohlisayo,

¹⁵ abalezindlela ezingaqondanga, lemikhondo ephambukileyo.

¹⁶ Kuzakukukhulula kowesifazana oyisifebe, kowesifazana omubi olamazwi akhohlisayo,

¹⁷ otshiye indoda yobutsha bakhe, wakhohlwa isivumelwano sikaNkulunkulu wakhe;

¹⁸ ngoba ukungena endlini yakhe kuholela ekufeni, lemikhondo yakhe endaweni yabafileyo.

¹⁹ Bonke abaya kuye kababuyi, kababuyeli endleleni zokuphila.

²⁰ Ngakhoke hamba endleleni yabalungileyo, uhambe ngendlela yabaqotho.

²¹ Ngoba abaqotho bazakuhlala elizweni, labaqondileyo basale kulo;

²² kodwa ababi bazakususwa elizweni, labakhohlisayo bakhutshwe kulo.