Izaga 16 - iBhayibhili Elingcwele 1978

¹ Umuntu wenza amacebo ngenhliziyo yakhe, kodwa yiNkosi emisa konke.

² Umuntu angathi zonke indlela zakhe zilungile, kodwa iNkosi ihlola inhliziyo.

³ Nikela eNkosini konke okwenzayo, amacebo akho azakuphumelela.

⁴ INkosi yenzile konke kube lomsebenzi wakho; lababi yabenzela usuku lokuchitheka.

⁵ INkosi izonda umuntu oyisiqholo, impela kayikuyekelwa.

⁶ Ngobuqotho langokuthembeka izono ziyathethelelwa, langokuyesaba iNkosi umuntu uyaxwaya okubi.

⁷ Nxa iNkosi ithokoziswa zindlela zomuntu, iyenza lezitha zakhe zihlalisane kuhle laye.

⁸ Kungcono ukuba lokuncinyane ulungile kulokuba lenotho enengi ungalunganga.

⁹ Inhliziyo yomuntu ilungisa indlela yakhe, kodwa yiNkosi eqondisa ukuhamba kwakhe.

¹⁰ Umlomo wombusi ukhuluma amazwi avela kuNkulunkulu, kaphosisi ekugwebeni kwakhe.

¹¹ Izilinganiso lesikali esilungileyo kungokweNkosi, zonke izilinganiso ezisemgodleni zingumsebenzi wayo.

¹² Ukwenza okubi kuzondwa ngamakhosi, ngoba isihlalo sobukhosi simiswa ngokulunga.

¹³ Ukukhuluma iqiniso kuthokozisa inkosi, iyathanda umuntu olikhulumayo iqiniso.

¹⁴ Ngolaka lombusi kuvela ukufa; ohlakaniphileyo uzaludambisa.

¹⁵ Lapho umbusi ebobotheka, kukhona ukuphila, lomusa wakhe unjengamayezi aletha insewula.

¹⁶ Ukuzuza ukuhlakanipha kungcono kulegolide, lokuzuza ukuqedisisa kungcono kulesiliva.

¹⁷ Umgwaqo wabaqotho uceza ububi; oqaphela ukuhamba kwakhe uyaphila.

¹⁸ Ukuzigqaja kwandulela ukubhujiswa, lomoya ozikhukhumezayo wandulela ukuwa.

¹⁹ Kungcono ukuba umuntu athobeke ahlangane labayanga, kulokuba abe phakathi kwabaziqakisayo ukwabelana labo impango.

²⁰ Olalela ukufundiswa uzaphumelela; othemba eNkosini uzakuthaba.

²¹ Ohlakaniphileyo kuthiwa ungumuntu oqedisisayo; amazwi amnandi enza abantu bakuvume lokho okutshiwoyo.

²² Ukuhlakanipha kungumthombo wokuphila kuye olakho, kodwa ubuthutha buyikutshaywa kwabayizithutha.

²³ Ingqondo yohlakaniphileyo iyamhola ekukhulumeni kwakhe, ukuba amazwi akhe enze abantu bakuvume lokho akutshoyo.

²⁴ Amazwi amnandi anjengoluju lwenyosi, amnandi emlonyeni, ayimpilo.

²⁵ Kukhona indlela ebonakala ilungile emuntwini, kodwa ekupheleni izafika ekufeni.

²⁶ Iphango lesisebenzi lisenze ukuba sisebenze, ukulamba kwaso kuyasikhuthaza.

²⁷ Umuntu omubi uceba okubi, amazwi akhe anjengomlilo otshisayo.

²⁸ Umuntu ophambeneyo ubanga inkani, onyeyayo wehlukanisa izinini.

²⁹ Umuntu omubi kakhulu uyenga abanye, abahambise ngendlela engalunganga.

³⁰ Ofica ilihlo uceba okubi, oluma indebe zakhe ufuna ukugebenga.

³¹ Izimvu zekhanda zingumqhele wodumo, zingumvuzo wokuphila okulungileyo.

³² Ophuza ukuthukuthela ungcono kuleqhawe, ozinqandayo ungcono kulaye onqoba umuzi.

³³ Inkatho yenziwa ngabantu, kodwa yiNkosi eyenza isiqumo.