Izaga 13 - iBhayibhili Elingcwele 1978

¹ Indodana ehlakaniphileyo ilalela ukulaya kukayise; kodwa isideleli kasilaleli ukukhuzwa.

² Olungileyo uzuza okuhle ngamazwi akhe, kodwa omubi ufisa ukwenza okubi.

³ Onqanda umlomo wakhe ugcina ukuphila kwakhe; ophophothayo uzakuchitheka.

⁴ Olivila uyalamba, kazuzi lutho, kodwa okhutheleyo uyanotha.

⁵ Olungileyo uyawazonda amanga; omubi uthelela inhloni lehlazo.

⁶ Ukulunga kulinda umuntu oqotho, kodwa ububi buchitha umuntu omubi.

⁷ Omunye umuntu uzitshaya onothileyo, kanti kalalutho; lomunye azitshaye ongumyanga, kanti unothile kakhulu.

⁸ Umuntu onothileyo umele ukuzihlenga, kodwa ongumyanga kasongelwa.

⁹ Ukukhanya kwabalungileyo kukhanya kuhle, kodwa ukukhanya kwababi kuzakucitshwa.

¹⁰ Ukuziqakisa kwezideleli kuveza ukuxabana; ukuhlakanipha kukwabathobekileyo.

¹¹ Inotho etholakala ngokuphangisa izakuphunguka, kodwa oyizuza kancane kancane uyayandisa.

¹² Ithemba eliphuzayo ligulisa inhliziyo, kodwa isifiso esigcwalisekileyo sinjengesihlahla esiletha ukuphila.

¹³ Odelela izeluleko uzehlisela ingozi; olalela imilayo uzakuvuzwa.

¹⁴ Ukufundisa kohlakaniphileyo kungumthombo wokuphila ukuba umuntu axwaye imijibila yokufa.

¹⁵ Ukuqedisisa kuhle kuveza ukuthandwa; indlela yabakhohlisayo izabachitha.

¹⁶ Ohlakaniphileyo wenza konke ngokwazi, kodwa isithutha sitshengisa obala ubuthutha baso.

¹⁷ Isithunywa esibi silethela abantu ingozi, kodwa isigijimi esithembekileyo sibalethela ukusila.

¹⁸ Ongananzi ukufundiswa uzakwehlelwa yibuyanga lehlazo, kodwa onanza ukukhuzwa uzakudunyiswa.

¹⁹ Isifiso esigcwalisekileyo simnandi emphefumulweni. Izithutha ziyala ukuphenduka ebubini.

²⁰ Ohamba labahlakaniphileyo uyahlakanipha, kodwa ophelekezela izithutha uzakuhlupheka.

²¹ Okubi kuthomana lezoni, kodwa okuhle kulandela abalungileyo.

²² Olungileyo utshiyela abantwana babantwana bakhe ilifa, kodwa inotho yesoni ibekelwa abalungileyo.

²³ Ingqatho ingabanika abayanga ukudla, kodwa lalokho kungachitheka ngenxa yokungalungi.

²⁴ Uyise ongasebenzisi uswazi uzonda umntanakhe, kodwa omthandayo uyamlaya.

²⁵ Olungileyo uyadla aze asuthe, kodwa isisu somubi siyaswela.