Izaga 12 - iBhayibhili Elingcwele 1978

¹ Othanda ukulaywa uthanda ukwazi; kodwa ozonda ukukhuzwa uyisithutha.

² Olungileyo uthola umusa eNkosini, kodwa oceba okubi iNkosi iyamlahla.

³ Kakulamuntu ongamiswa yibubi, kodwa kakulalutho olungaquphula impande zabalungileyo.

⁴ Umfazi olungileyo uludumo lwendoda yakhe, kodwa oyithela ihlazo unjengokubola kwamathambo ayo.

⁵ Amacebo abalungileyo alungile; amaqhinga ababi ayinkohliso.

⁶ Amazwi ababi alamandla okubhubhisa, kodwa amazwi abaqotho ayabophula.

⁷ Ababi bayachithwa, bangabe besaba khona, kodwa indlu yabalungileyo iyema.

⁸ Umuntu uyadunyiswa ngokuhlakanipha kwakhe, kodwa olenhliziyo embi uyadelelwa.

⁹ Umuntu othobekileyo ozisebenzelayo ungcono kulozitshaya umuntu omkhulu eswele ukudla.

¹⁰ Olungileyo unanzelela imfuyo yakhe, kodwa umuntu omubi ulolunya.

¹¹ Olima insimu yakhe uzakuba lokudla okunengi, kodwa owenza imisebenzi eyize kalangqondo.

¹² Inqaba yababi izakudilika, kodwa abalungileyo bazakuba lempande ezingapheliyo.

¹³ Omubi ubanjwa ngamazwi akhe amabi, kodwa olungileyo uyaphepha engozini.

¹⁴ Umuntu uzuza umvuzo omuhle ngamazwi akhe, athole okumfaneleyo ngomsebenzi wezandla zakhe.

¹⁵ Isithutha sithi indlela yaso ilungile, kodwa olalela izeluleko uhlakaniphile.

¹⁶ Isithutha sitshengisa intukuthelo yaso masinyane, kodwa ohlakaniphileyo nxa ethukwa kananzi.

¹⁷ Okhuluma iqiniso ufakaza ngeqiniso, kodwa ufakazi wamanga ukhuluma inkohliso.

¹⁸ Amazwi ababhudayo ahlaba njengomkhonto, kodwa inlimi zabahlakaniphileyo ziyasilisa.

¹⁹ Iqiniso nxa likhulunywa lima kokuphela, kodwa amanga ahlala umzuzu nje.

²⁰ Abaceba okubi balenhliziyo ezikhohlisayo, kodwa abaceba okuhle balokuthokoza.

²¹ Abalungileyo kabehlelwa ngokubi, kodwa ababi bagcwele izinhlupheko.

²² Abaqamba amanga bayisinengiso eNkosini, kodwa abenza iqiniso bayayithabisa.

²³ Ohlakaniphileyo ufihla ukwazi kwakhe, kodwa izithutha zitshumayela ubuthutha bazo.

²⁴ Abakhutheleyo bazakubusa, kodwa abangamavila bazasetshenziswa nzima.

²⁵ Ukukhathazeka kwenhliziyo kuyamdanisa umuntu, kodwa ilizwi elihle liyamthokozisa.

²⁶ Olungileyo uxwaya ububi, kodwa indlela yababi iyabaduhisa.

²⁷ Umzingeli olivila kabambi lutho, kodwa isikhuthali sizuza inotho.

²⁸ Indlela yokulunga iyikuphila, kodwa indlela yobubi iyikufa.