Izaga 11 - iBhayibhili Elingcwele 1978

¹ Isilinganiso esikhohlisayo siyisinengiso eNkosini, kodwa isilinganiso esilungileyo siyayithabisa.

² Nxa kufika ukuzigqaja, kufika lokudelela; kodwa kwabathobekileyo kukhona ukuhlakanipha.

³ Ubuqotho buyabaqondisa abaqotho, kodwa ububi buyababhubhisa ababi.

⁴ Inotho kayisizi ngosuku lolaka, kodwa ukulunga kukhulula ekufeni.

⁵ Ukulunga kuqondisa indlela yolungileyo, kodwa omubi uwiswa yibubi bakhe.

⁶ Ubuqotho bukhulula abaqotho, kodwa ababi babanjwa zinkanuko zabo.

⁷ Nxa umuntu omubi esifa, ithemba lakhe liyaphela, lethemba labangamesabiyo uNkulunkulu liyabhubha.

⁸ Olungileyo ukhululwa ekuhluphekeni, kodwa omubi ungena kukho.

⁹ Ngomlomo wakhe umuntu ongamesabiyo uNkulunkulu angamchitha umakhelwana wakhe, kodwa ngokwazi abalungileyo bayakhululwa.

¹⁰ Nxa abalungileyo bephumelela, umuzi uyathokoza; lapho ababi bebhubha, kukhona ukujabula.

¹¹ Ngokubusiswa kwabaqotho umuzi uyadunyiswa, kodwa ngamazwi ababi uyachitheka.

¹² Odelela umakhelwana wakhe kalangqondo, kodwa oqedisisayo uyazithulela.

¹³ Onyeyayo uyahlakaza imfihlakalo, kodwa othembekileyo kambuli izindaba.

¹⁴ Lapho kungekho izeluleko, abantu bayachitheka; kodwa lapho kukhona abeluleki abanengi, kukhona ukuvikeleka.

¹⁵ Okhuphela owezizwe isibambiso uzahlupheka; kodwa ozonda ukunika isibambiso uvikelekile.

¹⁶ Owesifazana olomusa uzuza udumo, amadoda akhutheleyo azuza inotho.

¹⁷ Umuntu olomusa uzenzela okuhle, kodwa umuntu olesihluku uyazilimaza.

¹⁸ Omubi uzuza umvuzo oyinkohliso, kodwa ohlanyela ukulunga uzazuza umvuzo weqiniso.

¹⁹ Olandela ukulunga uzakuphila, kodwa olandela ububi uzakufa.

²⁰ Abantu abalengqondo ezimbi bayazondwa yiNkosi. kodwa labo abalendlela ezilungileyo bayintokozo kuyo.

²¹ Impela omubi kayikuyekelwa, kodwa abalungileyo bazakhululwa.

²² Njengesongo legolide empumulweni yengulube, unjalo owesifazana obukekayo ongelangqondo.

²³ Izifiso zabalungileyo zizaveza okuhle, kodwa lokho abakufisayo ababi kuzaveza okulize.

²⁴ Umuntu angaphana, kanti anothe kakhulu; omunye angancitshana kakhulu, kanti uzakuswela.

²⁵ Ophanayo uzakunotha, losizayo uzasizwa.

²⁶ Ogodla amabele elindele ukukhwela kwentengo uzaqalekiswa ngabantu, kodwa obathengiselayo ngesikhathi sokuswela kwabo bazambusisa.

²⁷ Odingisisa okuhle uthola umusa, kodwa okubi kwehlela okudingayo.

²⁸ Othemba inotho yakhe uzawohloka njengamahlamvu ebusika, kodwa olungileyo uzahluma njengamahlamvu ehlobo.

²⁹ Oletha inkathazo emzini wakhe uzakudla ilifa eliyize, lesithutha sizakuba yinceku yohlakaniphileyo.

³⁰ Izithelo zokulunga zinjengesihlahla esiletha ukuphila, kodwa isihluku sichitha ukuphila.

³¹ Uba olungileyo ezuza umvuzo wakhe emhlabeni, kakhulu kangakanani omubi lesoni!