Izaga 1 - iBhayibhili Elingcwele 1978

Izaga zilosizo

¹ Nanzi izaga zikaSolomoni, indodana kaDavida, inkosi yakoIsrayeli,

² ukuba abantu bazuze ukuhlakanipha lokufundiswa, bazwisise amazwi aletha ukuqedisisa,

³ bafundiswe ukuhlakanipha lokulunga lokufaneleyo leqiniso;

⁴ abangelalwazi banikwe ukuhlakanipha, lamajaha anikwe ukwazi lengqondo ehlakaniphileyo.

⁵ Uba ohlakaniphileyo elalela, uzaqhubeka ekufundeni, loqedisisayo uzakuba lokwazi

⁶ ukuba aqedisise izaga lezimfihlakalo, lamazwi abahlakaniphileyo lamalibho abo.

⁷ Ukuyesaba iNkosi kuyikuqala kokwazi, kodwa izithutha ziyadelela ukuhlakanipha lokufundiswa.

Izeluleko kumajaha

⁸ Mntanami, zwana ukufundisa kukayihlo, ungakwali ukufundisa kukanyoko;

⁹ ngoba kuzakuba ngumqhele omuhle ekhanda lakho, lomgaxo omuhle entanyeni yakho.

¹⁰ Mntanami, uba izoni zikuhuga, ungavumi;

¹¹ uba zisithi: Woza, siyecathamela ukuchitha igazi lomuntu, sijume umuntu ongelacala;

¹² sizabaginya bephila njengendawo yabafileyo, babe njengabehlela egodini.

¹³ Sizazuza impahla ezinengi eziligugu, sigcwalise izindlu zethu ngempango;

¹⁴ ngakhoke hlangana lathi, isikhwama sethu semali sibe sinye.

¹⁵ Mntanami, ungahambi lazo, uzinqande ekuhambeni endleleni zazo;

¹⁶ ngoba zona zigijimela ebubini, ziphangisa ukuchitha igazi.

¹⁷ Kakusizi ukwendlala imbule uba inyoni ilibona.

¹⁸ Lababantu bayacathamela ukuchitha elabo igazi, bajume okwabo ukuphila.

¹⁹ Kunjalo ukuphela kwabo bonke abazuza inzuzo ngokuphanga, kuyachitha ukuphila kwabayizuzayo.

Ukuhlakanipha kuyamemeza

²⁰ UkuHlakanipha kuyamameza endleleni, kuyezwakalisa ilizwi lakho emidangeni,

²¹ kuyamemeza phezu kwemiduli, kuyatshumayela ngasemasangweni omuzi kusithi;

²² Koze kube nini lithanda ubuthutha, lina zithutha na? Koze kube nini izideleli zithokoza ngokudelela kwazo, leziphukuphuku zizonda ukwazi na?

²³ Lalelani ukukhuza kwami; sengizakulitshela imicabango yami, ngikhulume amazwi ami ahlakaniphileyo kini.

²⁴ Ngibizile, kodwa lina lala ukulalela; ngancenga, kodwa kakho owananzayo;

²⁵ ladelela konke ukweluleka kwami, kalivumanga ukukhuza kwami;

²⁶ ngakho minake ngizahleka lapho lifikelwa yikuhlupheka, ngiliklolodele lapho lisehlelwa yikwesaba,

²⁷ lapho ukwesaba kulehlela njengesiphepha, lokuhlupheka kwenu kufika njengesivunguzane, yebo, lapho lisehlelwa yibuhlungu losizi.

²⁸ Ng’khona bazangibiza, kodwa kangiyikusabela; Bazangifunisisa, kodwa kabayikungifumana.

²⁹ Ngoba babezonda ukwazi, bengakhethanga ukwesaba iNkosi,

³⁰ bengavumanga ukweluleka kwami, bedelela konke ukukhuza kwami;

³¹ ngakhoke bazakudla izithelo zokuhamba kwabo, basuthiswe ngamacebo abo.

³² Ngoba abayizithutha bayabulawa yikungaqapheli kwabo, labayiziphukuphuku bayabhujiswa yikungananzi kwabo.

³³ Kodwa ongilalelayo uzakuhlala evikelekile, achelese, angabi lavalo ngokubi.