Isambulo 7 - iBhayibhili Elingcwele 1978

AbakoIsrayeli ababekwa uphawu

¹ Emva kwalokhu ngabona izithunywa ezine zimi emagumbini womane omhlaba, zibambe imimoya emine yomhlaba ukuze kungavunguzi moya emhlabeni, lasolwandle, lakwesisodwa isihlahla.

² Ngasengibona esinye isithunywa siphuma empumalanga, siphethe uphawu lukaNkulunkulu ophilayo; samemeza ngelizwi elikhulu kuzo izithunywa ezine ezazinikwe amandla okona umhlaba lolwandle,

³ sisithi: Lingoni umhlaba lolwandle lezihlahla, size sibeke uphawu lukaNkulunkulu wethu emabunzini ezinceku zakhe.

⁴ Ngasengitshelwa ubunengi bababekwa uphawu, baba zinkulungwane ezilikhulu lamatshumi amane lane, ababekwa uphawu ezizweni zonke zakoIsrayeli;

⁵ esizweni sakoJuda babekwa uphawu abayizinkulungwane ezilitshumi lambili; esizweni sakoRubeni baba zinkulungwane ezilitshumi lambili; esizweni sakoGadi baba zinkulungwane ezilitshumi lambili;

⁶ esizweni sakoAsheri baba zinkulungwane ezilitshumi lambili; esizweni sakoNafitali baba zinkulungwane ezilitshumi lambili; esizweni sakoManase baba zinkulungwane ezilitshumi lambili;

⁷ esizweni sakoSimeyoni baba zinkulungwane ezilitshumi lambili; esizweni sakoLevi baba zinkulungwane ezilitshumi lambili; esizweni sakoIsakari baba zinkulungwane ezilitshumi lambili;

⁸ esizweni sakoZebuluni baba zinkulungwane ezilitshumi lambili; esizweni sakoJosefa baba zinkulungwane ezilitshumi lambili; esizweni sakoBenjamini baba zinkulungwane ezilitshumi lambili.

UJohane ubona embonweni abahlengiweyo ezulwini

⁹ Emva kwalokhu ngakhangela, ngabona ixuku elikhulu elingelakubalwa muntu, elivela kuzo zonke izizwe, lakuyo yonke imihlobo, lakibo bonke abantu, lasezindimini zonke, limi phambi kwesihlalo sobukhosi laphambi kweWundlu, lambethe ingubo ezimhlophe, liphethe ingatsha zamalala ezandleni,

¹⁰ limemeza ngelizwi elikhulu lisithi: Ukunqoba kungokukaNkulunkulu wethu ohlezi esihlalweni sobukhosi, lokweWundlu.

¹¹ Izithunywa zonke zazimi zihanqe isihlalo sobukhosi labadala lezidalwa ezine eziphilayo, zaziwisela phansi ngobuso phambi kwesihlalo sobukhosi zikhonza uNkulunkulu,

¹² zisithi: Ameni. Ukudunyiswa, lobukhosi, lokuhlakanipha, lokubonga, lodumo, lamandla, lokunqoba, kakube kuNkulunkulu wethu kuze kube nininini. Ameni.

¹³ Omunye wabadala wasesithi kimi: Ngobani laba abambethe ingubo ezimhlophe, futhi bavela ngaphi na?

¹⁴ Ngasengisithi kuye: Nkosi, nguwe owaziyo. Wasesithi kimi: Laba yibo abaphuma ezinhluphekweni ezinkulu, bagezisa ingubo zabo, bazenza zaba mhlophe egazini leWundlu.

¹⁵ Ngakhoke baphambi kwesihlalo sobukhosi sikaNkulunkulu bemkhonza emini lebusuku ethempelini lakhe, lohleziyo esihlalweni sobukhosi uzakuhlala labo.

¹⁶ Kabasayikulamba, kabasayikoma, kabasayikutshiswa lilanga lokutshisa konke,

¹⁷ ngoba iWundlu elingaphakathi kwesihlalo sobukhosi lizakuba ngumalusi wabo, libaholele emithonjeni yamanzi okuphila; loNkulunkulu uzakwesula inyembezi zonke emehlweni abo.