Isambulo 6 - iBhayibhili Elingcwele 1978

Ukuvulwa kwezimpawu

¹ Ngasengibona lapho iWundlu livula olunye lwezimpawu eziyisikhombisa, ngezwa esinye sezidalwa ezine eziphilayo sisithi ngelizwi elidumayo: Woza!

² Ngakhangela, ngabona ibhiza elimhlophe, oligadileyo ephethe umtshoko; wanikwa umqhele, waphuma engonqobayo lokuyakunqoba.

³ Lalapho livula uphawu lwesibili, ngezwa isidalwa sesibili sisithi: Woza!

⁴ Kwasekuphuma elinye ibhiza elibomvu, oligadileyo wavunyelwa ukuqeda ukuthula emhlabeni, ukuze abantu babulalane, wanikwa umhedla omkhulu.

⁵ Lalapho livula uphawu lwesithathu, ngezwa isidalwa sesithathu sisithi: Woza! Ngakhangela, ngabona ibhiza elimnyama, oligadileyo ephethe isilinganiso.

⁶ Ngasengisizwa kungathi yilizwi phakathi kwezidalwa ezine eziphilayo lisithi: Ingcebethu yamabele izakuthengwa ngendibilitshi ezilitshumi, lezingcebethu ezintathu zebhali zizakuthengwa ngendibilitshi ezilitshumi; kodwa ungoni amafutha lewayini.

⁷ Lalapho livula uphawu lwesine, ngezwa ilizwi lesidalwa sesine lisithi: Woza!

⁸ Ngakhangela, ngabona ibhiza eliliganu, oligadileyo ibizo lakhe kwakuthiwa ngukuFa, leHadesi lamlandela. Wanikwa amandla phezu kwengxenye yesine yokomhlaba ukuba abulale ngomkhonto, langendlala, langomkhuhlane, langezilo.

⁹ Lalapho livula uphawu lwesihlanu, ngabona ngaphansi kwealtare imiphefumulo yalabo ababebulewe ngenxa yelizwi likaNkulunkulu langenxa yobufakazi ababelabo.

¹⁰ Bamemeza ngelizwi elikhulu besithi: Nkosi ebusayo engcwele leqotho, koze kube nini ungathonisisi uphindisele igazi lethu kulabo abakhileyo emhlabeni na?

¹¹ Basebenikwa, kwaba yilowo lalowo ingubo emhlophe; batshelwa ukuba baphumule okwesikhatshana, kuze kuphelele inani labayizinceku labazalwane babo ababezakubulawa njengabo.

¹² Ngasengibona lapho livula uphawu lwesithupha, kwaba khona ukuzamazama okukhulu komhlaba; ilanga laphenduka laba mnyama, njengelembu lokuzila, lenyanga yaba bomvu njengegazi;

¹³ lezinkanyezi zomkhathi zawohlokela emhlabeni njengomkhiwa uwohlozwa ngumoya omkhulu;

¹⁴ lomkhathi wagoqeka njengomqulu wencwadi egoqwayo, lezintaba lezihlenge zonke zasuswa endaweni zazo.

¹⁵ Amakhosi omhlaba lezikhulu, lezinduna, labanothileyo, labalamandla, labo bonke abayizigqili, labakhululekileyo bacatsha ezimbalwini laphakathi kwamawa ezintaba,

¹⁶ besithi ezintabeni lasemaweni: Welani phezu kwethu, lisifihle emehlweni akhe ohlezi esihlalweni sobukhosi lasolakeni lweWundlu,

¹⁷ ngoba usuku olukhulu lolaka lwabo selufikile; ngobani abalamandla okuma na?