Isambulo 5 - iBhayibhili Elingcwele 1978

UJohane ubona embonweni iWundlu likaNkulunkulu

¹ Ngasengibona esandleni sokunene sakhe owayehlezi esihlalweni sobukhosi incwadi elotshwe ngaphakathi langaphandle, inanyekiwe ngempawu eziyisikhombisa.

² Ngasengibona isithunywa esilamandla simemeza ngelizwi elikhulu sisithi: Ngubani ofanele ukuvula lincwadi lokuqhaqha impawu zayo na?

³ Kwakungekho lamunye ezulwini, lasemhlabeni, langaphansi komhlaba owayelamandla okuyivula incwadi, lokukhangela phakathi kwayo.

⁴ Ngakhala kakhulu ngoba kungafunyanwanga loyedwa ofanele ukuyivula incwadi, lokukhangela phakathi kwayo.

⁵ Omunye wabadala wasesithi kimi: Ungakhali; ngoba sinqobile iSilwane sesizwe sakoJuda, iMpande kaDavida, ukuze siyivule lincwadi, siqhaqhe lezimpawu zayo eziyisikhombisa.

⁶ Ngasengibona phakathi kwesihlalo sobukhosi lezidalwa ezine eziphilayo langaphakathi kwabadala iWundlu limi kungathi lihlatshiwe, lilempondo eziyisikhombisa lamehlo ayisikhombisa okungomoya abayisikhombisa bakaNkulunkulu, abathunyelwe kuwo wonke umhlaba.

⁷ Leza, layithatha incwadi esandleni sakhe sokunene ohlezi esihlalweni sobukhosi.

⁸ Kuthe seliyithethe incwadi, izidalwa ezine eziphilayo labadala abangamatshumi amabili lane baziwisela phansi phambi kweWundlu, kuyilowo lalowo ephethe ichacho lemiganu yegolide igcwele impepha eyimikhuleko yabangcwele.

⁹ Bahlabelela ingoma entsha ethi: Ukufanele wena ukuyithatha incwadi lokuvula impawu zayo, ngoba wahlatshwa, wabahlengela uNkulunkulu ngegazi lakho abantu abavela emihlotsheni yonke, lasendimini zonke, lasezizweni zonke;

¹⁰ wabenza baba ngumbuso labapristi kuNkulunkulu wethu; bazakubusa emhlabeni.

¹¹ Ngasengikhangela, ngezwa ilizwi lezithunywa ezingelakubalwa; zonke zazimi zihanqe isihlalo sobukhosi, lezidalwa eziphilayo labadala; izigidigidi zazikhona lapho, izinkulungwane ngezinkulungwane, zamemeza ngelizwi elikhulu zisithi:

¹² Lifanele iWundlu elahlatshwayo ukwamukela amandla lenotho, lokuhlakanipha, lokunqoba, lodumo, lobukhosi, lokudunyiswa.

¹³ Ngezwa konke okudaliweyo okusezulwini, lokusemhlabeni, lokungaphansi komhlaba, lokusolwandle, kusithi: Kuye ohlezi esihlalweni sobukhosi lakulo iWundlu kakube ukudunyiswa, lodumo, lobukhosi, lokunqoba, kuze kube nini lanini.

¹⁴ Lezidalwa ezine eziphilayo zathi: Ameni. Labadala baziwisela phansi, bakhonza.