Isambulo 4 - iBhayibhili Elingcwele 1978

UJohane ubona embonweni ubukhosi bukaNkulunkulu ezulwini

¹ Emva kwalokhu ngakhangela, ngabona umnyango uvulekile ezulwini, lelizwi lokuqala engangilizwile likhuluma lami njengophondo, lathi: Yenyukela lapha, ngizakukutshengisa lokho okuzakwenzeka emva kwalokhu.

² Masinyane ngehlelwa nguMoya; ngabona isihlalo sobukhosi simi ezulwini, ngabona ohlezi phezu kwesihlalo sobukhosi.

³ Lohleziyo wayefana lelitshe elithiwa ijaspi, lelithiwa ikorneliya, ukukhangeleka kwakhe; lomchilowamakhosikazi ofana lelitshe elithiwa iemeraldi wawuzingelezele isihlalo sobukhosi.

⁴ Izihlalo zobukhosi ezingamatshumi amabili lane zazihanqe lesosihlalo sobukhosi; phezu kwazo kwakuhlezi abadala abangamatshumi amabili lane bembethe ingubo ezimhlophe, bethwele imiqhele emakhanda abo.

⁵ Lasesihlalweni sobukhosi kwakuphuma imibane, lamazwi, lokuduma; lezibane zomlilo eziyisikhombisa zazibhebha phambi kwazo, zona zingomoya abayisikhombisa bakaNkulunkulu;

⁶ laphambi kwesihlalo sobukhosi kwakukhona okunjengengilazi kufana longqoqwane. Phakathi kwesihlalo sobukhosi labadala kwakukhona izidalwa ezine eziphilayo ezilamehlo ngemuva langaphambili, zizingelezele isihlalo sobukhosi.

⁷ Isidalwa sokuqala sasifana lesilwane, isidalwa sesibili sifana lenkabi, isidalwa sesithathu silobuso bomuntu, isidalwa sesine sifana lokhozi oluphaphayo.

⁸ Izidalwa ezine eziphilayo, ileso laleso kuzo silamaphiko ayisithupha; emaceleni wonke langaphakathi zigcwele amehlo; emini lebusuku kazikhawuli ukuhlabela zisithi: Ingcwele, ingcwele, ingcwele iNkosi uNkulunkulu uSomandla, owayekhona lokhona lozakuba khona.

⁹ Kuthi lapho izidalwa eziphilayo zimnika ubukhosi lodumo lokubongwa lowo ohlezi esihlalweni sobukhosi, ophilayo kuze kube nininini,

¹⁰ abadala abangamatshumi amabili lane baziwisela phansi phambi kwakhe ohlezi esihlalweni sobukhosi, bamkhonza yena ophilayo kuze kube nininini, baphosela imiqhele yabo phambi kwesihlalo sobukhosi, behlabela besithi:

¹¹ Ufanele, wena Nkosi yethu loNkulunkulu wethu, ukwamukela ubukhosi lodumo lamandla, ngoba nguwe owadala izinto zonke, langenxa yentando yakho zaba khona, zadalwa.