Isambulo 22 - iBhayibhili Elingcwele 1978

¹ Wasengitshengisa umfula wamanzi okuphila acwengekileyo kakhulu, evela esihlalweni sobukhosi sikaNkulunkulu leseWundlu,

² egeleza phakathi kwendlela yomuzi. Kwakumi inxa zombili zomfula isihlahla sokuphila esithela izithelo ezilitshumi lambili, sithela izithelo zaso inyanga ngenyanga, lamahlamvu aso angawokwelapha izizwe.

³ Kakusayikuba khona lokukodwa okuqalekisiweyo. Isihlalo sobukhosi sikaNkulunkulu leseWundlu zizakuba kuwo, lezinceku zakhe zizakumdumisa,

⁴ zizakubona ubuso bakhe, lebizo lakhe lizakuba semabunzini azo.

⁵ Ubusuku kabusayikuba khona; kazidingi ukukhanya kwesibane loba okwelanga, ngoba iNkosi uNkulunkulu izakuba yikukhanya kwazo; zizakubusa kuze kube nini lanini.

Iqiniso lombono

⁶ Sasesisithi kimi: Lamazwi aqinisile aqotho; iNkosi uNkulunkulu wemimoya yabaprofethi isithumile isithunywa sayo ukuzitshengisa inceku zayo okuzakwenzeka masinyane.

⁷ Khangela, ngiyeza masinyane. Ubusisiwe owagcinayo amazwi esiprofethi alotshiweyo kulincwadi.

⁸ Mina Johane nginguye owazizwayo lowazibonayo lezizinto. Kuthe sengizizwile, ngazibona, ngaziwisela phansi ukuba ngikhuleke ngasenyaweni zesithunywa esangitshengisa zona.

⁹ Kodwa sathi kimi: Musa ukukwenza lokhu; ngiyinceku kanye lawe labazalwane bakho abaprofethi lalabo abagcina amazwi alincwadi. Khonza uNkulunkulu.

¹⁰ Sathi kimi: Ungawenzi imfihlo amazwi esiprofethi alotshiweyo kulincwadi, ngoba isikhathi siseduze.

¹¹ Ongalunganga kahlale esenza okungalunganga; ongcolileyo ahlale engcolile, kodwa olungileyo ahlale esenza ukulunga, longcwele ahlale engcwele.

¹² Khangela, ngiyeza masinyane, ngilomvuzo wami ukunika lowo lalowo njengemisebenzi yakhe.

¹³ NginguAlfa loOmega, owokuqala lowokucina, isiqalo lesicino.

¹⁴ Babusisiwe labo abagezisa ingubo zabo ukuba babe lelungelo esihlahleni sokuphila, bangene emzini ngamasango.

¹⁵ Ngaphandle kukhona izinja, labathakathi, leziphingi, lababulali, labakhonza izithombe, labo bonke abathanda inkohliso beyenza.

¹⁶ Mina Jesu ngisithumile isithunywa sami ukufakaza ngalezizinto kini emabandleni; ngiyimpande lenzalo kaDavida, indonsakusa ekhanyayo.

¹⁷ UMoya lomlobokazi bathi: Woza! Lozwayo lokhu katsho athi: Woza! Lowomileyo keze. Othandayo kathathe amanzi okuphila ngesihle.

¹⁸ Ngiyabaxwayisa bonke abawezwayo amazwi esiprofethi alotshiweyo kulincwadi. Uba umuntu esengezelela kuwo, uNkulunkulu uzakwengezelela kuye izifo ezilotshiweyo kulincwadi.

¹⁹ Uba umuntu ephungula amazwi esiprofethi alotshiweyo kulincwadi, uNkulunkulu uzakuphungula isabelo sakhe esihlahleni sokuphila lasemzini ongcwele, izinto ezilotshiweyo kulincwadi.

²⁰ Ofakaza ngalezizinto uthi: Impela ngiyeza masinyane. Ameni. Woza Nkosi Jesu!

²¹ Umusa weNkosi uJesu kawube labo bonke abangcwele. Ameni.