Isambulo 21 - iBhayibhili Elingcwele 1978

Izulu elitsha lomhlaba omutsha

¹ Ngasengibona izulu elitsha lomhlaba omutsha; ngoba izulu lokuqala lomhlaba wokuqala kwasekudlulile, lolwandle lungasekho.

² Ngabona umuzi ongcwele, iJerusalema elitsha, usehla uvela ezulwini kuNkulunkulu, ulungisiwe njengomlobokazi ocecele umkakhe.

³ Ngezwa ilizwi elikhulu livela esihlalweni sobukhosi lisithi: Khangela, indawo yokuhlala uNkulunkulu isebantwini; uzakuhlala labo, bazakuba ngabantu bakhe, uNkulunkulu uqobo uzakuba labo,

⁴ azesule izinyembezi zonke emehlweni abo; ukufa kakusayikuba khona, lokulila lokukhala lobuhlungu; ngoba izinto zakuqala sezidlulile.

⁵ Wasesithi ohlezi esihlalweni sobukhosi: Khangela, ngenza konke kube kutsha. Wathi: Bhala lokhu, ngoba lamazwi aqinisile aqotho.

⁶ Wasesithi kimi: Sekwenzekile. NginguAlfa loOmega, ukuqala lokucina. Owomileyo ngizakumnathisa ngesihle emthonjeni wamanzi okuphila.

⁷ Onqobayo uzakudla ilifa lalezizinto; ngizakuba nguNkulunkulu wakhe, yena abe yindodana yami.

⁸ Kodwa amagwala, labangakholwayo, labangcolileyo, lababulali, leziphingi, labathakathi, labakhonza izithombe, labo bonke abaqambi bamanga, isabelo sabo sizakuba echibini elivutha umlilo lesolufa, okuyikufa kwesibili.

IJerusalema lasezulwini

⁹ Kwasekusiza esinye isithunywa kweziyisikhombisa ezazilemiganu eyisikhombisa egcwele izifo eziyisikhombisa, sakhuluma lami sisithi: Woza lapha, ngikutshengise umlobokazi, umkaWundlu.

¹⁰ Sahamba lami ngigcwele uMoya, saya entabeni ende, sangitshengisa umuzi ongcwele waseJerusalema usehlela phansi uvela ezulwini kuNkulunkulu,

¹¹ ulenkazimulo kaNkulunkulu; ukukhanya kwawo kwakunjengelitshe elihle kakhulu elinjengelitshe elithiwa ijaspi, elicwazimula kakhulu.

¹² Wawulomduli omkhulu lophakemeyo, lamasango alitshumi lambili, lasemasangweni kulezithunywa ezilitshumi lambili; phezu kwamasango kulotshwe amabizo ezizwe ezilitshumi lambili zakoIsrayeli;

¹³ ngasempumalanga kwakulamasango amathathu, ngasenyakatho kulamasango amathathu, laseningizimu kulamasango amathathu, langentshonalanga kulamasango amathathu.

¹⁴ Umduli womuzi wawulezisekelo ezilitshumi lambili, laphezu kwazo kwakulamabizo alitshumi lambili abaphostoli abalitshumi lambili beWundlu.

¹⁵ Owayekhuluma lami wayelomhlanga wegolide wokulinganisa ukuba alinganise umuzi, lamasango awo, lemiduli yawo.

¹⁶ Umuzi wawakhiwe walingana inxa zonke, ububanzi bawo bulingana lobude bawo. Walinganisa umuzi ngomhlanga, waba ngamakhilomitha azinkulungwane ezimbili lekhulu, ubude lobubanzi lokuphakama kwawo kuyalingana.

¹⁷ Walinganisa umduli wawo, waba yizingalo ezilikhulu lamatshumi amane lane ngesilinganiso sabantu esasisetshenziswa yisithunywa.

¹⁸ Umduli wawakhiwe ngamatshe athiwa ijaspi, umuzi wona wakhiwe ngegolide elihle linjengengilazi ecwazimulayo.

¹⁹ Izisekelo zomduli womuzi zaziceciswe ngawo wonke amatshe amahle. Isisekelo sokuqala sasingeselitshe elithiwa ijaspi, esesibili singeselitshe elithiwa isafire, esesithathu singeselitshe elithiwa ikalkedoni, esesine singeselitshe elithiwa iemeraldi,

²⁰ esesihlanu singeselitshe isardikisi, esesithupha singeselitshe elithiwa ikorneliya, esesikhombisa singeselitshe elithiwa ikrisolite, esesificaminwembili singeselitshe elithiwa ionikse, esesificamunwemunye singeselitshe elithiwa itopazi, esetshumi singeselitshe elithiwa ikrisoprase, esetshumi lanye singeselitshe elithiwa ijasinte, lesetshumi lambili singeselitshe elithiwa iametiste.

²¹ Amasango alitshumi lambili ayenziwe ngelitshe eliligugu, ilelo lalelosango lalakhiwe ngelitshe linye eliligugu. Izindlela zomuzi zaziligolide, zicwazimula njengengilazi ekhanyayo.

²² Kangibonanga ithempeli phakathi komuzi, ngoba iNkosi uNkulunkulu, uSomandla, kanye leWundlu balithempeli lawo.

²³ Umuzi kawudingi ilanga lenyanga ukuba kukhanyise kuwo, ngoba inkazimulo kaNkulunkulu iyawukhanyisa, leWundlu liyisibane sawo.

²⁴ Izizwe zizakuhamba ekukhanyeni kwawo, lamakhosi omhlaba azakuletha kuwo ubukhosi bawo.

²⁵ Lamasango awo kawasoze avalwe emini; kakuyikuba khona ubusuku lapho.

²⁶ Kuzakulethwa kuwo ubukhosi lodumo lwezizwe.

²⁷ Kodwa kakusoze kwangena ulutho olungcolileyo kuwo kanye loyedwa owenza amanyala lenkohliso, kuphela abalotshiweyo encwadini yokuphila yeWundlu.