Isambulo 20 - iBhayibhili Elingcwele 1978

Ukubotshwa kukaSathane

¹ Ngasengibona isithunywa sisehla sivela ezulwini siphethe esandleni saso ikhiye yomgodi ongelamkhawulo leketane elikhulu.

² Sawubamba umgobho, inyoka enguSathane loMubi, sawubopha okweminyaka eyinkulungwane;

³ sawuphosela emgodini ongelamkhawulo, sawuvalela, sabeka uphawu phezu kwawo ukuze ungabe usaduhisa izizwe, ize iphele iminyaka eyinkulungwane. Emva kwalokho kumele ukuba ukhululwe okwesikhatshana.

Ukuvuka kokuqala

⁴ Ngasengibona izihlalo zobukhosi; bahlala kuzo abanikwa ukuthonisisa. Ngabona futhi imiphefumulo yalabo ababequnywe amakhanda ngenxa yokufakazela uJesu langenxa yelizwi likaNkulunkulu, ababengasikhonzanga isilo loba umfanekiso waso, bengabekwanga uphawu lwaso emabunzini abo loba ezandleni zabo; bavuka, babusa kanye loKristu iminyaka eyinkulungwane.

⁵ Abafileyo ababesele kabavukanga yaze yaphela iminyaka eyinkulungwane. Lokhu kuyikuvuka kokuqala.

⁶ Ubusisiwe, ungcwele olesabelo ekuvukeni kokuqala; phezu kwabanjalo ukufa kwesibili kakulamandla, kodwa bazakuba ngabapristi bakaNkulunkulu labakaKristu, bazakubusa kanye laye iminyaka eyinkulungwane.

Ukukhululwa kukaSathane

⁷ Lapho isiphelile iminyaka eyinkulungwane, uSathane uzakukhululwa ekubotshweni kwakhe,

⁸ aphumele ukuduhisa izizwe ezisemagumbini amane omhlaba, azibuthele ekulweni izimpi zikaGogi loMagogi, ubunengi bazo bungangetshebetshebe lolwandle.

⁹ Zaphumela emhlabeni wonke, zeza zazingelezela umuzi wabangcwele lomuzi othandekayo. Kodwa umlilo ovela ezulwini, waziqothula zonke;

¹⁰ loSathane owayeziduhisile waphoselwa echibini lomlilo lesolufa, lapho kukhona isilo lomprofethi wamanga; zizakuhlupheka khona emini lebusuku kuze kube nini lanini.

Ukwahlulelwa kokucina

¹¹ Ngasengibona isihlalo sobukhosi esikhulu lesimhlophe lohlezi kuso; kwanyamalala ebusweni bakhe izulu lomhlaba, kakwaze kusaba khona.

¹² Ngabona abafileyo, abakhulu labancinyane, bemi phambi kwesihlalo sobukhosi; lezincwadi zavulwa. Kwavulwa lenye incwadi eyincwadi yokuphila. Abafileyo bahlulelwa ngalokhu okwakulotshiwe ezincwadini langalokho ababekwenzile.

¹³ Lolwandle lwabakhupha abafileyo ababekulo, ukuFa lendawo yabafileyo kwakhupha abafileyo ababekukho; bonke bahlulelwa ngalokho ababekwenzile.

¹⁴ Kwathi ukuFa lendawo yabafileyo kwaphoselwa echibini lomlilo; lelichibi liyikufa kwesibili.

¹⁵ Uba ekhona ongafunyaniswanga elotshiwe encwadini yokuphila, waphoselwa echibini lomlilo.