Isambulo 17 - iBhayibhili Elingcwele 1978

Isiphingi esikhulu lesilo

¹ Kwasekusiza kimi esinye isithunywa sezithunywa eziyisikhombisa ezazilemiganu eyisikhombisa, sathi kimi: Woza lapha, ngikutshengise ukuthonisiswa kwesiphingi esikhulu esihlezi phezu kwamanzi amanengi,

² aphinga laso amakhosi omhlaba, labakhileyo emhlabeni badakwe liwayini lokuphinga kwaso.

³ Sangisa enkangala ngehlelwe nguMoya. Ngabona owesifazana egade isilo esibomvu, sigcwele amabizo enhlamba, silamakhanda ayisikhombisa lempondo ezilitshumi.

⁴ Owesifazana wayembethe okububende lokubomvu, ececiswe ngegolide langamatshe amahle langamangqongqo aligugu, ephethe esandleni sakhe inkezo yegolide igcwele amanyala lokungcola kokuphinga kwakhe;

⁵ ebunzini lakhe kwakulotshiwe ibizo eliyimfihlakalo lokuthi: IBabiloni elikhulu, unina weziphingi lowamanyala wonke omhlaba.

⁶ Ngasengibona ukuba owesifazana edakwe ligazi labangcwele legazi labafela uJesu. Kuthe lapho ngimbona, ngamangala kakhulu.

⁷ Kodwa isithunywa sathi kimi: Umangalelani na? Ngizakukutshela imfihlakalo yowesifazana leyesilo esilamakhanda ayisikhombisa lempondo ezilitshumi esimthweleyo.

⁸ Isilo osibonileyo sikhona, kasisekho; kodwa sizakuphuma emgodini ongelamkhawulo, siye ekubhujisweni. Labakhileyo emhlabeni, abamabizo abo angabhalwanga encwadini yokuphila kusukela ekudatshulweni komhlaba, bazakumangala ukubona ukuthi isilo sasikhona, kasisekho, kanti sizakuba khona.

⁹ Nanku ukwazi okulokuhlakanipha. Amakhanda ayisikhombisa ayizintaba eziyisikhombisa, ahlezi kuzo owesifazana;

¹⁰ futhi angamakhosi ayisikhombisa, amahlanu awo asewile, enye ikhona, enye kayikafiki; nxa isifikile, imele ukuhlala isikhatshana.

¹¹ Mayelana lesilo esasikhona, kodwa esingasekho, siyinkosi yobuficaminwembili; kodwa singenye yawayisikhombisa, siya ekubhujisweni.

¹² Impondo ezilitshumi ozibonileyo zingamakhosi alitshumi angakanikwa amandla obukhosi, kodwa azakwamukeliswa kanye lesilo umbuso abe ngamakhosi okwesikhathi.

¹³ Wona ayavumelana, anika isilo amandla okubusa kwawo.

¹⁴ Azakuhlasela iWundlu, kodwa iWundlu lizakuwanqoba, ngoba liyiNkosi yamakhosi loMbusi wababusi, abakanye lalo ngababiziweyo, labakhethiweyo, labathembekileyo.

¹⁵ Sasesisithi kimi: Amanzi owabonileyo, lapho sihlezi khona isiphingi, angabantu lamaxuku lezizwe lezindimi.

¹⁶ Lempondo ezilitshumi ozibonileyo zona kanye lesilo zizakusizonda isiphingi; zizakusichitha sisale siyize, zidle inyama yaso, zisitshise ngomlilo.

¹⁷ Ngoba uNkulunkulu ukufakile enhliziyweni zazo ukuba zenze icebo lakhe ngokubamqondo munye, zinike umbuso wazo esilweni, kuze kugcwaliseke amazwi kaNkulunkulu.

¹⁸ Owesifazana ombonileyo ungumuzi omkhulu obusa phezu kwamakhosi omhlaba.