Isambulo 12 - iBhayibhili Elingcwele 1978

Owesifazana lomgobho

¹ Kwaba khona ezulwini isibonakaliso esikhulu, owesifazana embethe ilanga, lenyanga ingaphansi kwenyawo zakhe, kukhona ekhanda lakhe umqhele wezinkanyezi ezilitshumi lambili;

² wayekhulelwe, wakhala ebuhlungwini bomhelo wakhe.

³ Kwabonakala esinye isibonakaliso ezulwini; kwaba khona umgobho omkhulu obomvu, olamakhanda ayisikhombisa lempondo ezilitshumi, lemiqhele eyisikhombisa isemakhanda awo;

⁴ umsila wawo wadonsa ingxenye yesithathu yezinkanyezi zomkhathi, waziphosela emhlabeni. Umgobho wema phambi kowesifazana obesezakubeletha, ukuze kuthi lapho esebelethile, udle umntwana wakhe.

⁵ Wabeletha umntwana wesilisa ozakubusa izizwe zonke ngentonga yensimbi; kodwa umntwana wakhe wahluthulelwa kuNkulunkulu lasesihlalweni sakhe sobukhosi;

⁶ lowesifazana wabalekela enkangala, lapho okwakulendawo ayeyilungiselwe nguNkulunkulu, ukuba ondliwe khona insuku eziyinkulungwane lamakhulu amabili lamatshumi ayisithupha.

⁷ Kwaba khona ukulwa ezulwini; uMikayeli lezithunywa zakhe balwa lomgobho. Umgobho ulezithunywa zawo lawo walwa,

⁸ kodwa wehlulwa, lendawo yawo kayabe isaba khona ezulwini.

⁹ Umgobho omkhulu waphoselwa phansi, inyoka endala ebizwa ngokuthi nguSathane loMubi, umkhohlisi womhlaba wonke; waphoselwa phansi emhlabeni kanye lezithunywa zakhe.

¹⁰ Ngasengisizwa ilizwi elikhulu ezulwini lisithi: Khathesi ukunqoba lamandla lobukhosi ngokukaNkulunkulu wethu, lokubusa kukaKristu wakhe, sekufikile; ngoba uphoselwe phansi ummangaleli wabazalwane bethu obamangalelayo emini lebusuku phambi kukaNkulunkulu.

¹¹ Bamnqobile ngegazi leWundlu langelizwi lobufakazi babo, ngoba badela ukuphila kwabo kwaze kwaba sekufeni.

¹² Ngakhoke thokozani lina mazulu lani elihlalo kuwo. Kodwa maye kuwe mhlaba lakuwe lwandle! Ngoba uSathane wehlele kini elolaka olukhulu, esazi ukuthi isikhathi sakhe sifitshane.

¹³ Kwathi umgobho usubonile ukuthi uphoselwe phansi emhlabeni wazingela owesifazana owayezele umntwana wesilisa.

¹⁴ Kodwa owesifazana wanikwa amaphiko amabili okhozi olukhulu ukuba awubalekele umgobho, aphaphele enkangala endaweni lapho abezakondliwa khona okweminyaka emithathu lenyanga eziyisithupha.

¹⁵ Lenyoka yakhupha amanzi emlonyeni wayo emva kowesifazana kungathi ngumfula ukuba immukise.

¹⁶ Kodwa umhlaba wamsiza owesifazana, umhlaba wakhamisa umlomo wawo, waginya amanzi ayekhutshwe ngumgobho emlonyeni wawo.

¹⁷ Umgobho wamthukuthelela owesifazana, wasuka wayakulwa labaseleyo benzalo yakhe, labo abagcina imilayo kaNkulunkulu labafakazela uJesu.

¹⁸ Wema esihlabathini solwandle.