Ingoma 8 - iBhayibhili Elingcwele 1978

¹ Kungathi ngabe ungumfowethu owamunya amabele kamama. Uba bengihlangana lawe phandle, bengizakukwanga, kungabi lamuntu ongidelelayo.

² Bengizakukuhola ngikungenise endlini kamama, ukuba ungifundise; ngizakukunathisa iwayini elixutshanisiweyo, kanye lomhluzi wamapomegranati ami.

³ Ingalo yakhe yasekhohlo ingaphansi kwekhanda lami, lengalo yakhe yokunene inyangigona.

Umyeni:

⁴ Ngiyalifungisa, lina madodakazi aseJerusalema, ukuba lingasiphazamisi lisivuse singakazivukeli isithandwa sami.

Abakhaphi:

⁵ Ngubani loyana ovela enkangala ebambelele phezu kothandekayo wakhe na? Ngakuvusa ngaphansi kwesihlahla somqokolo lapho owazalelwa khona, lapho unyoko akuzalela khona.

Umyeni:

⁶ Ngigqiza ngibe luphawu esifubeni sakho lophawu engalweni yakho; ngoba uthando lulamandla njengokufa, lomhawu ulesihluku njengeliba; uthando luyavutha njengomlilo, lutshise njengelangabi.

⁷ Amanzi amanengi kawalakulucima uthando, lezimpophoma kazilakulukhukhula. Uba umuntu ebezakunika impahla yonke yendlu yakhe eyenana ngothando, ibizakwaliwa.

Abakhaphi:

⁸ Silodadewethu omncinyane, kalawo amabele. Sizakwenza njani ngodadewethu lapho esecelwa na?

⁹ Uba engumduli, sizakwakha phezu kwakhe umphotshongo wesiliva; kodwa uba engumnyango, sizakumvalela ngamapulanka omkusu.

Umlobokazi:

¹⁰ Ngingumduli, lamabele ami ayimiphotshongo; isithandwa sami sizakwazi ukuba ngivikelekile.

Umyeni:

¹¹ USolomoni wayelesivini eBali‐Hamoni, wasesinikela isivini kubalindi, bonke babezakuhlawulela izithelo zaso inhlamvu zesiliva eziyinkulungwane.

¹² Kodwa isivini sami singesami; inhlamvu eziyinkulungwane zingezakho, Solomoni, abalindi bezithelo bazakuzuza amakhulu amabili.

¹³ Wena ohlala emasimini ami, abanakwethu balindele ilizwi lakho; ake ungizwise lona.

Umlobokazi:

¹⁴ Phangisa, wena sithandwa sami, ube njengempala lanjengegogo phezu kwezintaba ezithela amakha.