Ingoma 7 - iBhayibhili Elingcwele 1978

¹ Zinhle kangaka inyawo zakho emanyathelweni, wena ndodakazi yesikhulu! Amathangazi akho anjengamatshe amahle, abazwe yizingcitshi.

² Inkaba yakho injengomganu oyingubhe ohlala ugcwele iwayini elixutshanisiweyo. Isisu sakho sinjengesitha samabele esizingelezelwe yimiduze.

³ Amabele akho amabili anjengabantwana ababili abangamaphahla empala.

⁴ Intamo yakho injengomphotshongo owakhiwe ngempondo zendlovu. Amehlo akho ayiziziba zaseHeshiboni eziseduze lesango laseBeti‐Rabimi. Impumulo yakho iyindunduma njengeLebanoni ekhangelene leDamaseko.

⁵ Ikhanda lakho liphakeme njengentaba yaseKarmeli, lenwele ezilenga ekhanda lakho ziyacwazimula, inwele ezinde ezinhle zingahuga inkosi.

⁶ Umuhle wena, uyathandeka kangaka, sithandwa sami, uyangijabulisa.

⁷ Uphakeme njengesihlahla selala, lamabele akho anjengelixha lamasempe alo.

⁸ Ngathi: Ngizakhwela esihlahleni selala ukuze ngikhe izithelo zaso. Kungathi amabele akho angaba njengamahlukuzo evini, lephunga lomoya wakho libe njengelomqokolo,

⁹ lomlomo wakho ube njengewayini elihle. Lihle kusithandwa sami, litshelela ezindebeni lasemazinyweni.

Umlobokazi:

¹⁰ Mina ngingowesithandwa sami, sona siyangifisa kakhulu.

¹¹ Woza wena sithandwa sami, asiye egangeni silale ezixukwini;

¹² sihambe ekuseni siye ezivinini, sibone ukuba amavini asehluma, ekhupha impoko, lokuba amapomegranati asekhahlele yini. Lapho ngizakukunika uthando lwami.

¹³ Izithelo zamandrake zilephunga elimnandi, ngaphezu kweminyango yethu kukhona zonke inhlobo zezithelo ezinhle ezintsha lezindala, engizibekele wena sithandwa sami.