Ingoma 5 - iBhayibhili Elingcwele 1978

Umyeni:

¹ Sengingena esivandeni sami, dadewethu lomlobokazi wami, ngiyabutha imure yami lamakha ami, ngidle inyosi zami loluju lwami, nginathe iwayini lami lochago lwami. Dlanini, bangane bami, linathe, lize lidakwe luthando.

Umlobokazi:

² Ngiyalala, kodwa inhliziyo yami iphapheme. Nanso isithandwa sami siqoqoda emnyango, sisithi: Ngivulela, dadewethu lesithandwa sami, juba lami, opheleleyo wami, ngoba ikhanda lami limanzi ngamazolo, lenwele zami ngamathonsi ebusuku.

³ Ngasengikhuphile isigqoko sami, ngangingasifaka kanjani futhi na? Ngasengigezile inyawo zami, ngangingazingcolisa kanjani na?

⁴ Isithandwa sami sasesizama ukuvula, inhliziyo yami yaqubuka phakathi kwami.

⁵ Ngasukuma ukusivulela isithandwa sami, izandla zami zivuza imure, iminwe yami ithonta imure engamanzi ezibambeni zesivalo.

⁶ Ngasivulela isithandwa sami, kodwa sasitshibilike sahamba. Ngaphelelwa ngamandla ngokunyamalala kwaso. Ngasidinga, kodwa kangisifumananga, ngasibiza, kodwa kasingiphendulanga.

⁷ Ngaficwa ngabalindi ekubhodeni kwabo umuzi, bangitshaya bangilimaza, bangithathela ijazi lami labobalindi bemiduli yomuzi.

⁸ Ngiyalifungisa, lina madodakazi aseJerusalema, uba lifumanisa othandekayo wami limtshele ukuthi ngiyafa luthando.

Abakhaphi:

⁹ Isithandwa sakho simedlula ngani omunye othandekayo, wena omuhle phakathi kwabesifazana na? Isithandwa sakho simedlula ngani omunye othandekayo ukuba usifungise kanjalo thina na?

Umlobokazi:

¹⁰ Isithandwa sami sihle siyabukeka, siyakhanya phakathi kwenkulungwane ezinengi.

¹¹ Ikhanda laso linjengegolide elihle impela, inwele zaso zinde ziyibulunga, zimnyama njengewabayi.

¹² Amehlo aso anjengamajuba angasemanzini, kungathi ageziswe ngochago, agxiliswe njengamatshe aligugu.

¹³ Izihlathi zaso zinjengendima zamakha akhupha iphunga elihle. Indebe zaso zinjengemiduze zithonta imure elimanzi.

¹⁴ Izandla zaso ngezegolide zilamatshe amahle. Isisu saso sinjengokwenziwe ngophondo lwendlovu, kwafakwa amatshe amahle athiwa yisafire.

¹⁵ Imilenze yaso izinsika zelitshe elilukhuni ezisezisekelweni zegolide elihle. Ukubukeka kwaso kunjengeLebanoni, kuhle njengemikusu.

¹⁶ Amazwi aso amnandi kakhulu, siyathandeka kakhulu. Sinjeke isithandwa sami, linjeke ilikhwa lami, lina madodakazi aseJerusalema.