Ingoma 4 - iBhayibhili Elingcwele 1978

Umyeni:

¹ Umuhle, wena sithandwa sami, umuhle impela. Amehlo akho anjengamajuba ngaphakathi kweveli lakho; lenwele zakho zinjengomhlambi wembuzi zisehla emawatheni aseGileyadi.

² Amazinyo akho amhlophe anjengomhlambi wezimvukazi ezigundiweyo ezisand’ ukugeziswa; zilamaphahla zonke, kayikho leyodwa efelweyo.

³ Indebe zakho zinjengentambo ebomvu, lamazwi akho mahle. Izihlathi zakho phakathi kweveli lakho zinjengepomegranati elidatshuliweyo.

⁴ Intamo yakho injengomphotshongo kaDavida owakhiwe waba yinqaba, okulengiswe kuwo amahawu ayinkulungwane, wonke ayizihlangu zamaqhawe.

⁵ Amabele akho amabili anjengabantwana ababili abangamaphahla empala, abadlayo phakathi kwemiduze.

⁶ Emadabukakusa, kusapholile, kusesemnyama, ngizakhwela entabeni yemure lasoqaqeni lwempepha.

⁷ Umuhle ngokupheleleyo, wena sithandwa sami, kakukho sici kuwe.

⁸ Woza uvela eLebanoni, wena mlobokazi wami, woza uvela eLebanoni. Yehla engqongeni yaseAmana, lasengqongeni yaseSeniri leyaseHermoni, ezimbalwini zezilwane, lasezintabeni zezingwe.

⁹ Ungamukile inhliziyo yami, dadewethu lomlobokazi wami, ungamukile inhliziyo yami ngokungithi jeqe ngelihlo lakho, langelilodwa lamangqongqo akho.

¹⁰ Lumnandi kangaka uthando lwakho, dadewethu lomlobokazi wami! Luhle kangakanani uthando lwakho kulewayini, lephunga lamagcobo akho kulamakha wonke.

¹¹ Indebe zakho, mlobokazi wami, zimnandi njengenyosi, lolimi lwakho lunjengochago loluju, iphunga lezambatho zakho linjengephunga laseLebanoni.

¹² Udadewethu lomlobokazi wami uyisivande esikhiyiweyo, impela uyisivande esikhiyiweyo, lomthombo obiyelweyo.

¹³ Amahlumela akho ayizihlahla zamapomegranati, lezihlahla ezilezithelo ezinhle,

¹⁴ ezenadi lesafroni lekalamu lekinamoni, lezihlahla zonke zempepha, imure lenhlaba, lamakha wonke amahle kakhulu.

¹⁵ Ungumthombo omuhle kulayo yonke esivandeni, ungumthombo ogobhozayo olamanzi ehlayo evela entabeni yaseLebanoni.

Umlobokazi:

¹⁶ Vuka, wena moya wasenyakatho, uze lawe, moya waseningizimu, uphephethe esivandeni sami ukuba iphunga laso ligcwale emoyeni. Kasize isithandwa sami esivandeni sami, sidle izithelo zaso ezinhle.