Ingoma 3 - iBhayibhili Elingcwele 1978

¹ Embhedeni wami ubusuku ngobusuku ngiphupha ngimdinga lowo othandwa yinhliziyo yami; ngamdinga, kodwa kangaze ngamfica.

² Ngathi: Ngizakusuka nginqume lomuzi, ezindleleni zawo lasemagcekeni awo, ngimdinge yena othandwa yinhliziyo yami. Ngasengimdinga, kodwa kangimfumananga.

³ Abalindi bangifica ekunqumeni kwabo lomuzi, ngababuza ngathi: Limbonile othandwa yinhliziyo yami na?

⁴ Sengidlule kancinyane ngamfumana yena othandwa yinhliziyo yami. Ngambamba, kangivumanga ukuba ahambe ngaze ngamletha endlini kamama, endlini yakhe owangizalayo.

Umyeni:

⁵ Ngiyalifungisa, lina madodakazi aseJerusalema, ngezimpala langemiziki yeganga, ukuba lingasiphazamisi lisivuse singakazivukeli isithandwa sami.

Abakhaphi:

⁶ Kuyini lokhuya okuvela enkangala kunjengensika yentuthu, evela ekutshisweni kwemure lempepha, lokunjengamakha wonke abathengi na?

⁷ Kulithala likaSolomoni, lilamaqhawe angamatshumi ayisithupha, amaqhawe alamandla akoIsrayeli,

⁸ wonke ehlomile ngemikhonto ezingwazi zempi, elungele ukuhlatshwa komkhosi ebusuku.

⁹ Inkosi uSolomoni wazenzela ithala ngezigodo zaseLebanoni.

¹⁰ Imijabo yalo yaba ngeyesiliva, iseyamo salo singesegolide, lesihlalo salo sasilombala oyibubende, lalenziwe kuhle ngaphakathi ngempondo zendlovu.

¹¹ Phumani, lina madodakazi aseJerusalema, liphume lani, madodakazi aseZiyone, liyibone inkosi uSolomoni, ithwele umqhele eyawuthwaliswa ngunina mhla wosuku lomthimba wayo, mhla wosuku lokuthokoza kwayo.