Ingoma 2 - iBhayibhili Elingcwele 1978

¹ Ngililuba laseSharoni lomduze wasesigodini.

Umyeni:

² Njengomduze phakathi kwameva, sinjaloke isithandwa sami phakathi kwezintombi.

Umlobokazi:

³ Njengesihlahla somqokolo phakathi wezihlahla zesandle, sinjaloke isithandwa sami phakathi kwamajaha. Ngithanda ukuhlala emthunzini waso, lezithelo sazo zimnandi kimi.

⁴ Wangisa endlini yedili, lophawu lwakhe phezu kwami luluthando.

⁵ Ngisekelani ngezithelo zevini ezomisiweyo, lingiqinise ngomqokolo, ngoba ngiguliswa luthando.

⁶ Ingalo yakhe yasekhohlo ingaphansi kwekhanda lami, lengalo yakhe yokunene iyangigona.

Umyeni:

⁷ Ngiyalifungisa, lina madodakazi aseJerusalema, ngezimpala langemiziki yeganga, ukuba lingasiphazamisi lisivuse singakazivukeli isithandwa sami.

Umlobokazi:

⁸ Zwanini, isithandwa sami nansiyana siyeza! Siyeqa phezu kwezintaba, siqolotsha emaqaqeni.

⁹ Isithandwa sami sinjengempala lanjengegogo. Nanso simi ngemva komduli wethu, silunguza emawindini, sikhangele ngawo.

¹⁰ Isithandwa sami siyakhuluma sithi kimi: Vuka, sithandwa sami, wena omuhle, woza, sihambe.

¹¹ Ngoba ubusika sebudlulile, isikhathi sezulu sesiphelile.

¹² Amaluba ayahluma emhlabeni, isikhathi sokuhlabela sesifikile, lokukhala kwejuba kuyezwakala elizweni lakithi.

¹³ Isihlahla somkhiwa sesithela, lamavini asekhupha impoko ezinuka kuhle. Vuka, sithandwa sami, wena omuhle, woza, sihambe.

Umyeni:

¹⁴ Wena juba lami, elisengoxweni yedwala lasekusithekeni kweliwa akengibone ubuso bakho, ngizwe ilizwi lakho, ngoba lihle, lobuso bakho buyabukeka.

Abakhaphi:

¹⁵ Sibambeleni amakhanka, amakhanka amancinyane, onayo izivini zethu, ngoba sezilempoko.

Umlobokazi:

¹⁶ Ungowami othandekayo wami, lami ngingowakhe, uthokoziswa yimiduze.

¹⁷ Emadabukakusa kusapholile, kusesemnyama. phenduka, wena sithandwa sami, uziveze njengempala lanjengegogo phezu kwezintaba ezimakhelekethe.